Ózbekstan kedendik eksport tólemderin alyp tastady

TAShKENT. QazAqparat - Ózbekstandyq taýarlardyń eksportyn yntalandyrý men olardyń syrtqy naryqtaǵy básekege qabilettiligin arttyrý maqsatynda Ózbekstan prezıdenti eksporttyq keden tólemderin alyp tastady, dep habarlaıdy QazAqparat.

Atap aıtqanda, osy máselege baılanysty qol qoıylǵan jarlyqta barlyq taýar túrlerine kedendik tólemder alynyp tastaıdy. Sonymen qatar erekshe qadaǵalanatyn taýarlardy eseptemegende taýarlardyń eksportyn lıtsenzııalaý da alynyp tastaldy.

Buǵan qosa óz ónimderin eksportqa shyǵaratyn kásiporyndarǵa syrtqy naryqtarǵa marketıngtik zertteýler júrgizý úshin jáne jeke óz ónimderin jarnamalaý maqsatynda shet memleketterden saýda úıleri men ókildikterdi ashýǵa ruqsat etilgen.

Sonymen qatar osy jarlyqta Ózbekstanǵa ımporttaýǵa tyıym salynǵan taýarlardyń tizimi kórsetilgen. Onyń quramyna Ózbekstannyń memlekettik jáne qoǵamdyq qurylymyn, terrıtorııalyq tutastyǵyn, memlekettik táýelsizdik pen saıası táýelsizdigin buzýǵa, soǵys pen terrorızmdi, zorlyq-zombylyq pen násilshildik pen dinshildikti nasıhattaýǵa baǵyttalǵan, sondaı-aq pornografııalyq baspa ónimderi men qoljazbalardy, klıshe, sýretter men fototúsirilmder men fotoplenkalar, kıno jáne aýdıoónimder sııaqty ózge de dúnıeler bar.