Ózbekstan Qazaqstannyń aýyl sharýashylyǵy ónimderine aktsızdik salyqty tómendetti
Qabyldanǵan sharalar Ózbekstan Respýblıkasy Prezıdentiniń aǵymdaǵy jyldyń naýryz aıyndaǵy Qazaqstanǵa resmı saparynyń jemisi bolyp tabylady, dep habarlaıdy QazAqparat.
Osy arqyly aýyl sharýashylyǵy ónimderin óndiretin qazaqstandyqtar úshin Ózbekstan naryǵyna shyǵýǵa qolaıly jaǵdaı jasaldy. Atap aıtqanda, makaron ónimderine aktsızdik salyq joıyldy (buryn 30 jáne 50% bolatyn). Sonymen qatar, Ózbekstanǵa tasymaldanatyn birqatar aýylsharýashylyq ónimderine aktsızdik salyq tómendedi. Atap aıtqanda, salyq 55% bıdaı unyna (11-den 5%-ǵa deıin), maqsary men kúnbaǵys maıyna 2 ese; (20-dan 10%-ǵa deıin), sirke sýy qosylmaǵan konservilengen kókónisterge 5 ese (50-den 10%-ǵa deıin), jemis jáne kókónis shyryndaryna 2,3 ese (70-ten 30%-ǵa deıin), daıyn tuzdyq pen tuzdyq daıyndaýǵa 2,8 ese ( 70-ten 25%-ke deıin, qyzanaq ketchýby men maıonezden basqa) tómendegen.
«2016 jyly Qazaqstannan Ózbekstanǵa eksporttalǵan aýyl sharýashylyǵy ónimderiniń somasy 426,9 mln. dollardy qurady. Sonymen qatar, ótken jyly Qazaqstan Ózbekstanǵa 1 725,2 myń tonna bıdaı, 4,7 mln tonna un, 96 myń tonna kúnbaǵys tuqymyn, 10,2 myń tonna ósimdik maıyn jáne 51 myń tonna kartopty eksportqa shyǵarǵan edi», - delingen Aýyl sharýashylyǵy mınıstrligi taratqan baspasóz baıanynda.