Ózbekstan Qazaqstannan aqsha aýdarymy eń kóp jasalǵan elderdiń úshtigine endi

TAShKENT. QazAqparat – 2022 jyldyń birinshi toqsanynda Qazaqstannan shetelge aqsha aýdarymdary júıesi arqyly 189,5 mlrd teńge ($442,8 mln) jiberildi, dep habarlaıdy QazAqparat menshikti tilshisi.

Finprom.kz derekteri boıynsha, birinshi toqsanda Túrkııa, Ózbekstan jáne Qyrǵyzstan Qazaqstannan aqsha aýdarymdaryn jóneltý boıynsha eń tanymal baǵyttarǵa aınalǵan.

Qarajattyń jartysyna jýyǵy eki elge ǵana jiberildi: Túrkııaǵa (52,3 mlrd teńge) jáne Ózbekstanǵa (38,6 mlrd teńge). Kóshbasshylar úshtigin QR-dan jiberilgen 33,2 mlrd teńge qarjy kólemimen Qyrǵyzstan aıaqtaıdy.

Portaldyń málimetinshe, QR-dan aýdarylǵan qarajat boıynsha buǵan deıin birneshe jyl boıy kósh bastap kelgen Reseı 28,5 mlrd teńge aýdarym kólemimen nebári tórtinshi oryndy ıelendi. Bul ótken jylmen salystyrǵanda 36,2%-ǵa az.

Besinshi orynda Grýzııa. Aýdarym kólemi – 13,3 mlrd teńge, bul bir jyl burynǵydan 4,3 esege artyq.