Ózbekstan Qazaqstannan 500 kıik alý boıynsha kelissóz júrgizip jatyr

TAShKENT. KAZINFORM – Qazaqstan men Ózbekstan kıik popýlıatsııasyn saqtaýǵa baǵyttalǵan berlisken memorandým qabyldaý múmkindigin zerdelep jatyr, dep habarlaıdy Kazinform agenttiginiń menshikti tilshisi. 

Ózbekstan Ekologııa mınıstrliginiń baspasóz qyzmeti qazirgi ýaqytta qos eldiń jaýapty vedomstvolary arasynda kelissóz júrgizip jatqanyn rastady. Qujatty bıyl tamyz aıynda qabyldaý josparlanyp otyr.

Memorandým aıasyndaǵy kelissózderde ózbek tarapy Qazaqstannan shamamen 500 kıik laǵyn alyp, ony óz aýmaǵyna jersindirý bastamasyn kóterdi. Mınıstrliktiń málimetinshe, mamandar aqbókenderdiń Ózbekstan klımatyna beıimdelýin zerttemek.

Sonymen qatar, qabyldanýy múmkin qujatta aqbókenderdiń esebin júrgizýge qatysty birlesken sharalar legi jazylǵan. Kıik popýlıatsııasyn baqylap otyrý úshin Qazaqstan men Ózbekstan derekter bazasyn ıntegratsııalap, málimetterdi bir platformaǵa jınaqtaýǵa nıetti.

Toqtala ketsek, qazirgi ýaqytta Ózbekstan aýmaǵynda 100 shaqty kıik qaldy. Bul rette shekara qorshaýlary aqbókenderdiń tabıǵı mıgratsııasyn shektep tastady.

Eske salaıyq, bıyl 17 maýsymda Prezıdent Qasym-Jomart Toqaev Qytaı úkimetine 1,5 myń kıikti tartý etetinin málimdedi. Keıin Ekologııa jáne tabıǵı resýrstar mınıstrligi atalǵan bastamaǵa qatysty pikir bildirdi.