Ózbekstan Qazaqstannan 5 mln tonnaǵa deıin munaı alýǵa nıetti
Aıta keterligi, búgin Senattyń Ekonomıkalyq saıasat, ınnovatsııalyq damý jáne kásipkerlik komıtetinde "Qazaqstan Úkimeti men Ózbekstan Úkimeti arasyndaǵy energetıka salasyndaǵy yntymaqtastyqtyń keıbir máseleleri týraly negizdemelik kelisimdi ratıfıkatsııalaý týraly" zań jobasy talqylanǵan bolatyn. Osy másele boıynsha negizgi baıandama jasaǵan vıtse-mınıstrdiń aıtýynsha, Qazaqstan men Ózbekstan sońǵy jyldary munaı-gaz salasyndaǵy áleýetti aıtarlyqtaı damytty. Búgingi tańda munaı men gaz jetkizý sektoryndaǵy ózara is-qımyl jolǵa qoıyldy.
"Memleket basshysynyń 2017 jylǵy 16 qyrkúıekte Ózbekstanǵa jasaǵan resmı sapary barysynda Qazaqstan men Ózbekstan Úkimeti arasynda energetıka salasy boıynsha negzidemelik kelisimge qol qoıyldy. Osy kelisimniń negizinde eki el arasyndaǵy munaı-gaz, munaı-gaz-hımııa jáne elektr energetıkasy salasyndaǵy yntymaqtastyq damıtyn bolady. Sonymen qatar dostyǵy jarasqan kórshi memleketterdiń yntymaqtastyǵy artýy úshin geografııalyq jaǵdaılar da eskerildi", - dedi ol.
Onyń aıtýynsha, atalǵan kelisimdi ratıfıkatsııalaý biraz máseleni sheshýge múmkindik beredi. Atap aıtqanda, elimizdiń munaı eksportyn ulǵaıtý úshin Ózbekstanǵa shıki munaı jetkiziledi. Ekinshiden qysqy-kúzgi kezeńde Qazaqstannyń ońtústik óńirlerin tabıǵı gazben úzdiksiz qamtamasyz etý máselesi sheshedi. Sondaı-aq ózbek eliniń gaz-kólik júıesin paıdalaný arqyly ońtústik aımaqtaǵy gaz qaýipsizdigin damytýǵa yqpal jasalady. Úshinshiden munaı-gaz-hımııa jobalary boıynsha tájirıbe almasýǵa múmkindik ashylady.
"Búgingi tańda Ózbekstannyń munaıǵa degen qajettiligin qamtamasyz etý úshin 2018 jyly 260 myń tonnadan astam munaı jetkizildi. Qazaqstan aldaǵy ýaqytta da Ózbekstanǵa óz resýrstarynan munaı jetkizýge daıyn. Shaǵyr stansasynda temir jol tsısternalaryn aýystyryp tıeý arqyly Keńqııaq-Qumkól munaı qubyry boıynsha jetkiziledi. Jalpy aıtqanda, Ózbekstan jylyna 5 mln tonnaǵa deıin munaı satyp alýdy josparlaýda. Sonyń ishinde Qazaqstannan 2 mln, Reseıden 3 mln tonna satyp alýǵa múddeli. Biraq, sońǵy kezderi ózbek tarapy 5 mln tonnany da bizden alýy múmkin ekendigin bildirip otyr", - dedi vıtse-mınıstr.
