Ózbekstan Qazaqstanmen shekaradaǵy shekteýlerdi uzartady
AQTAÝ. KAZINFORM – Mańǵystaý oblysy boıynsha Memlekettik kirister departamentiniń habarlaýynsha, Ózbekstan Respýblıkasynyń «Dáýit-ata» ótkizý pýnktinde jeke tulǵalar men kólik quraldar úshin shekteýler jalǵasady.
- Ózbekstan Respýblıkasy Ekonomıka jáne qarjy mınıstrligi janyndaǵy Keden komıtetiniń «Dáýit-ata» ótkizý pýnktinde Ózbekstan-Qazaqstan memlekettik shekarasynan ótetin jeke tulǵalar men kólik quraldarynyń qaýipsizdigin qamtamasyz etý maqsatynda osy ótkizý pýnkti arqyly jeke tulǵalardyń, jeńil avtomobılder men avtobýstardyń qozǵalysyn shekteýdi uzartady. Bul ótkizý pýnktin qaıta qurý boıynsha júrgizilip jatqan jumystarǵa baılanysty, - delingen habarlamada.
Aıta keteıik, «Dáýit-ata» ótkizý pýnkti qazaqstandyq «Tájen» ótkizý pýnktimen shektesedi. Bul keden beketi Mańǵystaý oblysy Beıneý aýdany aýmaǵynda ornalasqan.
Buǵan deıin Qazaqstan men Ózbekstan shekarasynda júk kólikteriniń keptelisi týraly jazǵan bolatynbyz.