Ózbekstan Qazaqstanmen shekaradaǵy ótkizý pýnktterine «jasyl» jáne «qyzyl» dáliz júıesin engizbek

TAShKENT. KAZINFORM — Bıyl qyrkúıekten bastap Ózbekstannyń baqylaý-ótkizý pýnktterine kólikterge arnalǵan «jasyl» jáne «qyzyl» dáliz júıesi engiziledi, dep habarlaıdy Kazinform agenttiginiń menshikti tilshisi.

Tıisti jarlyqqa Ózbekstan prezıdenti Shavkat Mırzıeev qol qoıdy. Qujatqa saı, birinshi kezekte atalǵan júıe Tashkent oblysyndaǵy «Gıshtkýprık» (Qazaqstan tarapynda «Jibek joly») jáne «Zangıota» («Qaplanbek») jáne Qaraqalpaqstandaǵy «Dáýit-ata» («Tájen») ótkizý pýnktilerine engiziledi.

Talapqa sáıkes, qaýipsiz taýar tıelgen kólikter «jasyl» dáliz arqyly tekseristen jedel óte alady. Al «qyzyl» dálizge túsken temir tulparlarǵa tolyq kedendik baqylaý júrgiziledi. Aıta keteıik, keden qyzmetkerleri «jasyl» dálizde turǵan kólik kúdik týdyrsa, onda oǵan jeke tekserý júrgizýge quqyly.

Joba ázirge pılottyq negizde jumys isteıdi. Eger ol tıimdi nátıje berip jatsa, onda 2026 jyly 1 qyrkúıekten bastap barlyq shekara pýnktilerine engizý josparlanǵan.

Buǵan deıin habarlaǵanymyzdaı, Qazaqstan men Ózbekstan arasynda qosymsha 4 saýda dálizi ashylýy múmkin.

Eske salaıyq, Qazaqstan men Ózbekstan júk tasymaly máselesin sheshýmen aınalysatyn jedel shtab qurmaq.

Sonymen qatar, taıaýda qazaq-ózbek shekarasynda keden termınaly ashylady. 6 gektardy aýmaqty qamtyp jatqan nysan zamanaýı tekserý, rásimdeý qurylǵylarymen jabdyqtalǵan.

Buǵan qosa, bıyl aqpannan bastap qazaq-ózbek shekarasyndaǵy «Jibek joly» ótkizý beketi jóndeýge jabyldy.