Ózbekstan qazaqstandyqtardy shekaradan jeke kýálikpen ótkizý tártibin engizýge nıetti
TAShKENT. KAZINFORM – Ózbek tarapy Qazaqstan, Reseı jáne Ázerbaıjan azamattaryn shekaradan jeke kýálikpen ótkizý tártibin engizý múmkindigin qarastyryp jatyr, dep habarlaıdy Kazinform agenttiginiń menshikti tilshisi.
Atalǵan usynys elge keletin týrıster sanyn arttyrý jónindegi prezıdent jarlyǵynda jazylǵan. Qujatqa Shavkat Mırzıeev 15 mamyrda qol qoıdy.
Prezıdent tapsyrmasyna saı, Ózbekstannyń Іshki ister mınıstrligi úsh aıdan keshiktirmeı Qazaqstan, Reseı jáne Ázerbaıjan memleketterimen kelissóz bastaýy tıis.
Aıta ketsek, qazirgi ýaqytta Qyrǵyzstan azamattary Ózbekstanǵa jeke kýálikpen kele alady. Eki el arasynda shekaradan ishki qujatpen ótý tártibi 2023 jyly engizilgen.
Eske salaıyq, byltyr Olıı Majlıstiń Zań shyǵarý palatasy depýtattarynyń aldynda sóz sóılegen Ózbekstan prezıdenti Shavkat Mırzıeev Qazaqstan men Tájikstan azamattaryn jeke kýálikpen qabyldaý tártibin engizý josparlanyp otyrǵanyn aıtty.
Sonymen qatar Ózbekstan 1 maýsymnan bastap Bahreın, Kýveıt jáne Oman azamattary úshin 30 kúndik vızasyz rejım engizedi.