Ózbekstan Kaspıı teńiziniń túbimen tartylatyn baılanys jelisine qosylýǵa nıetti

TAShKENT. KAZINFORM – Ózbekstan Kaspıı teńiziniń túbimen Qazaqstannan Ázerbaıjanǵa tartylatyn talshyqty-optıkalyq baılanys jelisine qosylýǵa múddeli, dep habarlaıdy Kazinform agenttiginiń menshikti tilshisi.

Bul týraly «Oʻzbekiston 24» telearnasyna suhbat bergen saýdııalyq DataVolt kompanııasynyń atqarýshy dırektory Radjıt Nanda málim etti.

Onyń aıtýynsha, atalǵan baılanys jelisine qosylý ınternet-trafıktiń balama baǵytyna oıysýǵa múmkindik beredi.

- Biz qazirgi ýaqytta Qazaqstannan Ázerbaıjanǵa Kaspıı teńiziniń túbimen tartylatyn baılanys jelisine qosylý múmkindigin qarastyryp jatyrmyz. Joba Ózbekstan úshin úlken strategııalyq jáne ekonomıkalyq mańyzǵa ıe. Bul baılanys qaýipsizdigin qamtamasyz etip qana qoımaı, elge mıllıardtaǵan paıda ákelýi múmkin, - dedi Radjıt Nanda.

Eske salaıyq, keshe Qazaqstannyń energetıka mınıstri Erlan Aqkejenov Qazaqstan men Ázerbaıjan arasynda Kaspıı teńiziniń túbinen «jasyl» energııa kabelin tóseý jobasynyń daıyndyq barysyn baıandaǵan edi. Sondaı-aq, bul jobany iske asyrý úshin 1 100 tonna kabel qajet.

Buǵan deıin habarlaǵanymyzdaı, byltyr mamyrda Qazaqstan, Ózbekstan jáne Ázerbaıjannyń energetıka mınıstrleri Kaspıı teńiziniń astymen elektr kabelin tartý jobasyn iske asyrý memorandýmyna qol qoıdy.