Ózbekstan Izraıldiń Qatar astanasyna jasaǵan soqqysyn aıyptady

TAShKENT. KAZINFORM — Ózbekstannyń Syrtqy ister mınıstrligi Izarıl bıliginiń Dohada jasaǵan áskerı aktsııasyna qatysty málimdeme jasady, dep habarlaıdy Kazinform agenttiginiń menshikti tilshisi.

— Ózbekstan Izraıldiń Doha qalasyna jasaǵan soqqylaryn aıyptap, ony egemendik quqyǵyn buzý jáne Qatar memleketiniń qaýipsizdigine qater tóndirý dep sanaıdy. Mundaı áreketter BUU jarǵysyna, sondaı-aq halyqaralyq quqyq qaǵıdalaryna qaıshy, — delingen SІM málimdemesinde. 

Vedomstvodan atap ótkendeı, Ózbekstan Taıaý Shyǵystaǵy onsyz da kúrdeli jaǵdaıdy ýshyqtyratyn kez-kelgen áreketke túbegeıli qarsy.

Eske salaıyq, 9 qyrkúıekte Izraıl Doha qalasyna áýeden soqqy jasady.

Saldarynan Qatardyń ishki qaýipsizdik kúshteriniń qyzmetkeri qaza tapty. 

Keıin Izraıl premer-mınıstri HAMAS basshylyǵyna jasalǵan soqqyny terrorızmge qarsy kúres úshin amalsyzdan barǵan qadam dep málimdedi.