Ózbekstan Irandaǵy otandastaryn Túrikmenstan aýmaǵy arqyly shyǵarady

TAShKENT. KAZINFORM – Ózbekstannyń Syrtqy ister mınıstrligi Irannan Túrikmenstan aýmaǵy arqyly shyǵýǵa nıetti azamattarǵa járdemdesedi, dep habarlaıdy Kazinform agenttiginiń Tashkenttegi menshikti tilshisi.

Dunyo aqparat agenttiginiń málimetinshe, Ózbekstannyń Ashhabad pen Tegerandaǵy elshilikterimen tyǵyz baılanysta jumys júrip jatyr.

Dıplomattar Túrikmenstan men Irannyń shekarasynda ornalasqan Serahs qalasynda otandastaryn kútip alady. Olardy ári tasymaldaý úshin arnaıy kólikter qarastyrylǵan.

Eske salsaq, buǵan deıin Ózbekstannyń Syrtqy ister mınıstrligi qajylyq, demalys jáne basqa da maqsatta Taıaý Shyǵys elderine barýǵa nıetti azamattarǵa saparlaryn keıinge shegerýdi usyndy.

Sonymen, 28 aqpanda Izraıl Iranǵa soqqy jasady. Sol kúni Iran Izraılge qarymta jaýap retinde birneshe zymyran jiberdi.

Keshe Irannyń IRNA memlekettik aqparat agenttigi eldiń Joǵarǵy kóshbasshysy aıatolla Álı Hameneı qaza tapqanyn habarlady. Buǵan qosa, Álı Hameneıdiń keńesshisi - Iran Qorǵanys keńesiniń hatshysy Álı Shamhanı men Islam revolıýtsııasy saqshylary korpýsynyń qolbasshysy Mohammad Pakpýr kóz jumdy.

Keıin Aıatolla Arafı Irannyń ýaqytsha Joǵary jetekshisi bolyp taǵaıyndaldy.

Búgin AQSh prezıdenti Donald Tramp Iranǵa qarsy áskerı operatsııa qoıylǵan mindetter tolyq oryndalǵanǵa deıin jalǵasatynyn habarlady.

Munymen birge, Taıaý Shyǵystaǵy turaqsyzdyq saldarynan munaı baǵasy kóterilip, aktsııalar quldyrady.