Ózbekstan hýsıtterdiń Mekkege baǵyttalǵan shabýylyn aıyptady
ASTANA. KAZINFORM — 17 qyrkúıek, beısenbi kúni Ózbekstan Saýd Arabııasyndaǵy qasıetti Mekke qalasyna baǵyttalǵan hýsıtterdiń ushqyshsyz ushý apparatymen jasaǵan shabýylyn qatań aıyptady, dep habarlaıdy Anadoly.
Ózbekstannyń Syrtqy ister mınıstrligi Telegram áleýmettik jelisindegi málimdemesinde Saýd Arabııasymen tolyq yntymaqtastyq bildirip, qasıetti oryndarǵa, beıbit turǵyndarǵa nemese azamattyq ınfraqurylymǵa qaýip tóndiretin kez kelgen áreketti qolaısyz dep sanaıtynyn atap ótti.
Tashkent barlyq tarapty «barynsha sabyr saqtaýǵa», halyqaralyq quqyq normalaryn qatań saqtaýǵa, sondaı-aq memleketterdiń egemendigin, táýelsizdigin jáne aýmaqtyq tutastyǵyn qurmetteýge shaqyrdy.
— Biz shıelenisti báseńdetýge, qaqtyǵystyń odan ári taralýyna jol bermeýge jáne óńirde beıbitshilik, qaýipsizdik pen turaqtylyqty qamtamasyz etýge baǵyttalǵan kúsh-jigerdi qoldaımyz, — delingen málimdemede.
Iemende hýsıtter 2014 jyly el astanasy Sanany basyp alǵannan beri soǵys júrip jatyr. Osydan keıin 2015 jyly Saýd Arabııasy bastaǵan arab koalıtsııasy halyqaralyq deńgeıde moıyndalǵan Iemen úkimetin qoldaý úshin qaqtyǵysqa aralasty.
Shilde aıynda kóterilisshiler toby Er-Rııadqa teńiz blokadasyn jarııalaǵannan keıin úkimet áskerlerimen qaıtadan qaqtyǵystar bastaldy. Jaqynda hýsıtter Qyzyl teńiz jaǵalaýy men Bab ál-Mandeb buǵazy mańynda ilgerilegenin málimdedi. Sondaı-aq hýsıtter Saýd Arabııasynyń munaı ınfraqurylymyna soqqy bergen.
Saýd Arabııasy bastaǵan koalıtsııa sársenbi kúni tańerteń Saýd Arabııasynyń áýe qorǵanys kúshteri Iemendegi hýsıtter toby Mekkeniń ońtústigine qaraı ushyrǵan drondy qasıetti qalanyń áýe keńistigine kirmeı turyp, ustap alyp joıǵanyn habarlady.
Buǵan deıin Saýd Arabııasy Mekke mańynda hýsıtterdiń dronyn qaǵyp túsirgenin málimdedi.
