Ózbekstan halqy el Konstıtýtsııasyn bilýden jalpyulttyq emtıhan tapsyrady

TAShKENT. QazAqparat - 2021 jyldyń jeltoqsan aıynda Ózbekstanda jalpyulttyq konstıtýtsııalyq emtıhan ótedi. QazAqparat bul týraly uza-ǵa silteme jasap habarlaıdy.

Eldiń Ádilet mınıstrliginiń málimetine qaraǵanda, mınıstrlik Konstıtýtsııalyq sotpen birlesip, azamattardyń Konstıtýtsııany bilý deńgeıin tekserý úshin jalpyulttyq konstıtýtsııalyq emtıhan ótkizbek.

Emtıhanǵa 15 jastan asqan barlyq azamat qatysa alady jáne ol erikti túrde, tegin sonymen qatar barlyǵyna ashyq bolmaq.

Josparǵa saı emtıhan eki kezeńmen uıymdastyrylady. Birinshi kezeń 1 jeltoqsan kúni Tashkent ýaqytymen saǵat 9:00-den 13:00-ge deıin onlaın rejımde ótedi. Osy aralyqta qatysýshylarǵa 20 test suraǵy jáne 1 shyǵarmashylyq suraq beriledi. Ekinshi kezeń Konstıtýtsııa kúni qarsańynda ótip, onlaın translıatsııalanady. Ár qatysýshyǵa 10 suraq qoıylady. Sońynda eń joǵary nátıje kórsetken 3 qatysýshy jeńimpaz atanady.

Jeńimpazdar aqshalaı syılyqpen marapattalady:

І oryn – 15 mıllıon sým (602 409 teńge);

ІІ oryn – 10 mıllıon sým (401 606 teńge);

ІІІ oryn – 5 mıllıon sým (200 803 teńge).