Ózbekstan halqynyń sany 38,5 mln adamnan asty
ASTANA. KAZINFORM – Ózbekstannyń turaqty halqynyń sany bıylǵy birinshi jartyjyldyqta byltyrǵy sáıkes kezeńmen salystyrǵanda 1,7 paıyzǵa ósip, 38 mln 519 myń 500 adamǵa jetti, dep habarlaıdy Anadolý.
Ózbekstan Memlekettik statıstıka komıtetiniń qańtar–maýsym aılaryna arnalǵan demografııalyq derekterine sáıkes, eldegi halyq tyǵyzdyǵy byltyrǵy sáıkes kezeńdegi bir sharshy shaqyrymǵa 84,3 adamnan 85,8 adamǵa deıin artqan.
1 shildedegi jaǵdaı boıynsha halyq sany 38 mln 519 myń 500 adamdy qurady. Bul byltyrǵy sáıkes kezeńmen salystyrǵanda 1,7 paıyzǵa kóp.
Qalalarda 19 mln 608 myń 900 adam, aýyldyq jerlerde 18 mln 910 myń 600 adam turady. Erler jalpy halyq sanynyń 50,4 paıyzyn, áıelder 49,6 paıyzyn quraıdy.
Qańtar–maýsym aılarynda elde 373 myń 400 sábı dúnıege keldi. Bul byltyrǵy sáıkes kezeńmen salystyrǵanda 32 myń 100-ge az. Osy kezeńde 86 myń 900 adam qaıtys boldy. Halyqtyń tabıǵı ósimi 286 myń 500 adamdy qurady.
Derekterge sáıkes, bıylǵy birinshi jartyjyldyqta shetelden Ózbekstanǵa 1 649 adam kóship kelse, 5 422 adam shetelge qonys aýdarǵan.
Halyq sanynyń eń joǵary ósimi Sýrhandarııa oblysy men Tashkent qalasynda tirkeldi – árqaısysynda 2,1 paıyz. Halqy eń kóp óńir retinde 4 mln 413 myń 700 turǵyny bar Samarqand oblysy qalyp otyr.
Aıta keteıik, buǵan deıin jarty jylda 4,5 myńnan astam qazaqstandyq Ózbekstanǵa emdelý úshin barǵanyn jazdyq.
Sondaı-aq Ázerbaıjanda halyq sanynyń 10 mıllıonnan asqany belgili boldy.
