Ózbekstan gýmanıtarlyq kómektiń qalǵan bóligin Qyrǵyzstanǵa berdi
ÁNDІJAN OBLYSY. Maýsymnyń 30-y. QazAqparat /Qurmat Samarhan/ - Ózbekstan Qyrǵyz Respýblıkasyndaǵy tártipsizdikterden zardap shekkenderge usynylǵan gýmanıtarlyq kómektiń qalǵan bóligin Qyrǵyzstanǵa jetkizdi, dep habarlaıdy bizdiń tilshimiz oqıǵa ornynan.
Maýsymnyń 30-y, sársenbi kúni, Ándijan oblysyndaǵy ózbek-qyrǵyz shekarasyndaǵy «Dýstlık» ótkizý beketi arqyly Qyrǵyzstanǵa jalpy salmaǵy 200 tonnadaı, quny 2,4 mıllıon AQSh dollary bolatyn gýmanıtarlyq kómek jiberildi.
Ándijan oblysynyń hokimııatynyń shtabynan habarlaǵandaı, bosqyndar ornalasqan aımaqtarǵa shetelden jalpy quny 3 926,6 myń AQSh dollary bolatyn gýmanıtarlyq kómek kelip tústi.
Atap ótetin jáıt, Ándijan oblysynyń aýmaǵynda QR-nyń ońtústiginde oryn alǵan tártipsizdikterden zardap shekken Qyrǵyzstan azamattary úshin uıymdastyrylǵan 30-dan astam bosqyndar lageri ornalasqan.
