Ózbekstan Grýzııadaǵy eń iri teńiz portyn salý jobasyna qatysýy múmkin
TAShKENT. KAZINFORM – Ózbekstan Grýzııadaǵy Anaklııa teńiz portyn salý jobasyna qatysý múmkindigin zerdelep jatyr, dep habarlaıdy Kazinform agenttiginiń Tashkenttegi menshikti tilshisi.
Taıaýda Ózbekstannyń Kólik mınıstri Ilhom Mahkamov pen Investıtsııa, ónerkásip jáne saýda mınıstri Lazız Kýdratov Grýzııanyń kólik ınfraqurylymymen tanysty. Vedomstvo basshylary Anaklııa, Potı jáne Batýmı porttaryn aralady.
Resmı málimetke saı, sapar barysynda Grýzııanyń Qara teńiz jaǵalaýynda salyp jatqan Anaklııa teńiz portyna erekshe nazar aýdaryldy. Qurylys aıaqtalǵannan keıin ol barlyq úlgidegi kemelerdi qabyldaýǵa qaýqarly bolmaq.
- Ózbek tarapy Grýzııadaǵy eń iri tereń teńiz portyn salý jobasyna qatysý múmkindigine erekshe nazar aýdarady. Ony «Qytaı - Qyrǵyzstan - Ózbekstan» temirjol dálizimen jalǵaýǵa bolady, - delingen Investıtsııa mınıstrliginiń habarlamasynda.
Qosa ketsesk, taıaýda «Qytaı - Qazaqstan - Ózbekstan - Aýǵanstan» baǵytynda konteınerlik júk tasymaly jolǵa qoıyldy.
Buǵan deıin ózbekstandyq sarapshy Mýrat Bahadırov túrki elderi óziniń geografııalyq ornalasýyn geoekonomıkalyq artyqshylyqqa aınaldyryp jatqany jaıly aıtqan edi.
