Ózbekstan geologııalyq barlaýǵa bizden 12 ese kóp qarjy jumsap otyr – akademık S. Dáýkeev

Qazaqstan bir sharshy shaqyrym jerdi geologııalyq barlaýǵa 8 dollar ǵana jumsaıdy. Bul irgedegi Ózbekstannyń kórsetkishinen 12 ese az. Astanada ótken Qazaqstan geologtarynyń tuńǵysh sezinde Ulttyq ǵylym akademııasynyń akademıgi Serikbek Dáýkeev osyndaı problemany ortaǵa saldy, dep habarlaıdy QazAqparat tilshisi.

«Biz qazir bir kenishti ıgere bastaǵanda onyń ornyn toltyrý jolyn oılaý kerektigin umytyp kettik. Qazir Qazaqstan 1 sharshy shaqyrym jerge geologııalyq barlaý júrgizý úshin 8 dollar jumsaıdy. Al Ózbekstan 98 dollar jumsaıdy. Aýstralııa nemese Kanada sııaqty elderde bir sharshy metrge 200 dollardan artyq shyǵyndaıdy. Bir ǵana ken orny 100 jyl ishinde anyqtalǵan kenishterdiń bárin barlaýǵa ketken shyǵyndy aqtaıdy», - dedi ǵalym.

Akademık geologtarǵa kórsetiletin qurmettiń álsireýi salaǵa myqty mamandardyń kelýine kedergi ekenin de aıtty.

«30 jyldyń ishinde geologtar týraly bir de bir fılm, bir de bir telebaǵdarlama túsirilgen joq. Geologtarmen Prezıdent nemese Premer-Mınıstr deńgeıinde birde-bir kezdesý ótkizilgen joq. Geologtar ondaı nazarǵa laıyq emes pe?», - dedi Serikbek Dáýkeev.