Ózbekstan Gazany qalpyna keltirý jumystaryna qatysýǵa daıyn – Shavkat Mırzıeev
TAShKENT. KAZINFORM – Ózbekstan Beıbitshilik keńesin qurý týraly bitimgershilik bastamany qoldady jáne ony júıeli júzege asyrý úshin járdemdesýge daıyn. Bul týraly atalǵan keńestiń alǵashqy otyrysyna qatysqan prezıdent Shavkat Mırzıeev málim etti, dep habarlaıdy Kazinform agenttiginiń Tashkenttegi menshikti tilshisi.
Sóz basynda kórshiles el basshysy keńestiń jumysy Gaza sektoryndaǵy ekonomıkalyq jáne áleýmettik jaǵdaıdy qalpyna keltirýge qaýqarly ekenine senim bildirdi.
- Barlyq taraptyń úılestirilgen is-qımyly qaqtyǵystan keıingi ahýaldy turaqtandyrýǵa jáne Gazany tez arada qalpyna keltirýge yqpal etedi. Ózbekstan ol jerde turǵyn úı, balabaqsha, mektep jáne aýrýhanalar salýǵa óz úlesin qosýǵa daıyn. Biz bul tarıhı múmkindikti órkendegen, ekonomıkalq damyǵan jańa Gazany qurý úshin paıdalanýymyz kerek, - dedi Ózbekstan prezıdenti óz baıandamasynda.
Eske salaıyq, keshe Memleket basshysy Qasym-Jomart Toqaev Vashıngtonda ótken Beıbitshilik keńesiniń alǵashqy otyrysyna qatysty. Onyń barysynda sóz sóılegen Prezıdent Beıbitshilik keńesi kópjaqty kúsh-jigerdiń áleýetin arttyratyn, zaman talabyna saı uıym ekenin atap ótti.
Sondaı-aq, Qasym-Jomart Toqaev Qazaqstan Gaza sektoryndaǵy ahýaldy turaqtandyryp, qalpyna keltirý jumystaryna atsalysýǵa daıyn ekenin málimdedi.