Ózbekstan ǵalymdary tumaýǵa qarsy dárilik preparat ázirlep shyǵardy
Preparat saltanatty túrde tanystyryldy. Oǵan Ózbekstan Respýblıkasy Ǵylym akademııasynyń Bıoorganıkalyq hımııa ınstıtýtynyń dırektory, akademık Shavkat Salıhov, Densaýlyq saqtaý mınıstrligi janyndaǵy Sanıtarlyq-epıdemıologııalyq salaýat agenttigi dırektorynyń orynbasary Bahrom Almatov, Farmatsevtıkalyq salany damytý agenttiginiń dırektory Sardor Karıev, Innovatsııalyq damý mınıstriniń orynbasary Olımjon Týıchıev, qytaı-ózbek medıtsınalyq tehnoparkiniń dırektory Sharofıddın Mırzaahmedov qatysty.
Qytaı ǵalymdary júrgizgen zertteýler nátıjesinde Ózbekstan Respýblıkasy Ǵylym Akademııasynyń Bıoorganıkalyq hımııa ınstıtýtynyń ǵalymdary ázirlegen «Rýtan» tumaýǵa qarsy preparaty SARS CoV-2 tıpti tumaý vırýsynyń áserin 78,3 paıyzǵa azaıtatyny anyqtaldy. Osynyń negizinde atalǵan preparat GMP talaptaryna sáıkes Qytaı-ózbek medıtsınalyq tehnoparkinde daıyn dárilik zat retinde óndirildi. «Rýtannyń» 11 myń qaptamasy koronavırýspen kúreste gýmanıtarlyq kómek retinde Iranǵa jiberildi.
Innovatsııalyq damý mınıstrligimen birlesip jumys isteıtin Qytaı-ózbek medıtsınalyq tehnoparkine 20 mıllıon dollar kóleminde ınvestıtsııa salyndy, 300 jumys orny ashyldy. Tehnoparktiń ereksheligi - shyǵys medıtsınasynyń dástúrli emdeý ádisteri men batys medıtsınasynyń ozyq jetistikteriniń qatar qoldanylýynda.
Búginde tehnoparkte dárilik preparattardyń 8 túrin óndiretin farmatsevtıkalyq zaýyt jumys isteıdi. Zaýyt GMP talaptaryna jáne basqa halyqaralyq standarttarǵa tolyǵymen saı keledi.
GMP (Good Manufacturing Practice – tıisti óndiristik tájirıbe) – dárilik preparattardy, bıologııalyq belsendi qospalardy jáne keıbir tamaq ónimderin óndirýge qoıylatyn talaptardy anyqtaıtyn halyqaralyq standart.
