Ózbekstan ǵalymdary qyzanaqtan COVID-19-ǵa qarsy jańa vaktsına jasap shyǵardy

Ózbekstan ǵalymdary koronavırýs ınfektsııasyna qarsy alǵash ret qyzanaq ósimdiginen tikeleı tutynýǵa bolatyn genetıkalyq vektorlar men qyzanaq ósimdigine negizdelgen COVID-19 jańa býyndaǵy vaktsına jasady. Kazinform bul týraly frontiersin.org saıtyna silteme jasap. 

Ǵalymdar koronavırýstyń S1 antıgen aqýyzyn kodtaıtyn gen fragmentin arnaıy vektorlarǵa ornalastyryp, ony qyzanaq jasýshasynyń genomyna engizdi. Bul jasýshalardan S1 antıgen aqýyzyn únemi óndiretin qyzanaq ósimdigi alyndy. Osyndaı ósimdikten alynǵan qyzanaq jemisi 0,77 mkg/g mólsherinde turaqty S1 antıgen aqýyzyn sıntezdeıtini kórsetildi jáne TOMAVAC vaktsınasy retinde tańdaldy.

Belgilengen TOMAVAC vaktsınasy tyshqandar men erikti adamdarǵa synalǵanda, sarysýda (IgG) jáne ishekte beıtaraptandyratyn antıdenelerdiń (IgA) joǵary deńgeıin shyǵaratynyn kórsetti.

Eksperıment nátıjesinde tyshqandar men eriktilerde jaǵymsyz janama áserler baıqalmaǵan.

Bul zertteý TOMAVAC eki fazaly (ishek shyryshty qabaty jáne qan arqyly ótetin) qorǵanysty qamtamasyz etetin qaýipsiz vaktsına ekenin kórsetti jáne ol ǵylymı qaýymdastyqqa alǵashqy tikeleı tutynýǵa arnalǵan COVID-19 vaktsınasy retinde usynyldy.

Mańyzdysy, qurylǵan vektorlyq júıe men tájirıbe negizinde, qajet bolǵan jaǵdaıda, qysqa merzimde memlekette ártúrli ınfektsııalarǵa qarsy vaktsınalardy jasap, engizý múmkindigi jáne mamandardyń jańa býyny qalyptasty.

Vaktsına boıynsha zertteýler «Frontiers in Nutritional Immunology» (IF=5.0) bedeldi sheteldik jýrnalynda jaryq kórdi jáne tyshqandar men erikti adamdarda júrgizilgen ımmýnogendik, bıoqaýipsizdik synaqtar nátıjeleri jarııalandy.