Ózbekstan fýtbolshylarynyń jeńilisine kinálilerdi izdeýdiń qajeti joq — Mırzıeev
TAShKENT. KAZINFORM — Búgin eldiń belsendi jastarymen kezdesken Ózbekstan prezıdenti Shavkat Mırzıeev ulttyq quramanyń álem chempıonatyndaǵy oıynyna qatysty pikir bildirdi, dep habarlaıdy Kazinform agenttiginiń Tashkenttegi menshikti tilshisi.
Ózbekstan basshysynyń aıtýynsha, fýtbolshylar myqty qarsylastarmen ótken kezdesýlerde tájirıbe jınaqtap, biliktiligin shyńdady.
— AQSh pen Meksıka alańdarynda ótken ulttyq quramamyzdyń oıyndaryn búkil halqymyzben birge erekshe tolǵanyspen tamashaladyq. FIFA reıtınginde 5-orynda turǵan Portýgalııa, 13-oryndaǵy Kolýmbııa jáne kóptegen oıynshylary Eýropanyń jetekshi klýbtarynda óner kórsetetin Kongo quramasyna qarsy matchtarda fýtbolshylarymyz mol tájirıbe jınap, chempıonattyń atmosferasyn sezindi, — dedi Sh. Mırzıeev.
Kórshiles eldiń prezıdenti Abbos Faızýllaev pen Eldor Shomýrodovtyń álem chempıonatynda gol soǵyp, ózbek halqyna qýanysh syılaǵanyn erekshe atap ótti. Shavkat Mırzıeevtiń aıtýynsha, Ózbekstan quramasynyń ónerine qatysty qazir túrli pikirler aıtylyp júr.
— Alaıda el namysyn qorǵaǵan ulttyq quramamyzdyń oıynshylaryna shekten tys emotsııaǵa berilip kiná artý, olardan min izdeý — halqymyzdyń bolmysyna tán qasıet emes. Kerisinshe, dál qazir olardy qoldap, rýhyn kóterý mańyzdy», — dedi ol.
Ózbekstan basshysy úlken jeńisterdiń áli alda ekenin aıtty. Onyń sózinshe, bul maqsatqa jetý úshin fýtboldy damytýǵa jan-jaqty qoldaý kórsetilip, osy sport túrine baǵyttalatyn ınvestıtsııa kólemi artady.
Eske salaıyq, Ózbekstan quramasy álem chempıonatynda Kolýmbııa, Portýgalııa jáne Kongo Demokratııalyq Respýblıkasynyń fýtbolshylaryna ese jiberip, jarys jolyn aıaqtady.
Buǵan deıin Ózbekstannyń tarıhı matchynda Tashkenttegi jankúıerler qalaı qoldaý kórsetkenin jazǵan edik.
