Ózbekstan fýtboldan álem chempıonatynyń kollektsııalyq monetasyn shyǵarady
ASTANA. KAZINFORM — Ózbekstannyń Ortalyq banki 18 maýsymnan bastap el quramasynyń fýtboldan álem chempıonatyna alǵash ret qatysýy qurmetine estelik altyn jáne kúmis monetalardy aınalymǵa shyǵarady.
999 synamaly altyn jáne kúmis estelik monetalardyń aldyńǵy jaǵynda Ózbekstan fýtbol qaýymdastyǵynyń logotıpi, klassıkalyq fýtbol doby jáne «Tarıhı jeńis. Ózbekstan 2026 jylǵy álem chempıonatynda» degen jazý bar.
Artqy jaǵynda jankúıerler arasynda «Aq qasqyrlar» ataýymen belgili ulttyq quramanyń sımvoly — qasqyr beınelengen.
Monetalardyń 100 dana altyn jáne 1000 dana kúmis shekteýli tırajben shyǵarylǵan. Olar el boıynsha 690 kommertsııalyq bank bólimshesi arqyly satylymǵa shyǵarylady.
Eske sala ketsek, álem chempıonaty 11 maýsym men 19 shilde aralyǵynda AQSh, Kanada jáne Meksıkada ótedi.
Osyǵan deıin Ózbekstan ulttyq fýtbol quramasy Nıý-Iorktegi qaýipsizdik tekserisinen ótkenin jazǵanbyz.
