Ózbekstan elshisi Shyǵys Qazaqstan oblysyna keldi
ÓSKEMEN. QazAqparat - Óskemende óńir ákiminiń birinshi orynbasary Erlan Aımuqashev pen Ózbekstan Respýblıkasynyń Qazaqstandaǵy Tótenshe jáne ókiletti elshisi Saıdıkram Nııazhodjaev kezdesti, dep habarlaıdy «QazAqparat» tilshisi.
Taraptar mádenı-ekonomıkalyq baılanystardy tereńdetý múmkindikterin talqylady.
E. Aımuqashev Shyǵys Qazaqstannyń túrli salalardaǵy zor áleýeti týraly aıtyp, oblys aýmaǵynda eki eldiń 39 birlesken kásiporny qyzmet júrgizip otyrǵanyn jetkizdi. Ol Qazaqstan tarapy Ózbekstanmen aradaǵy yntymaqtastyqqa múddeli ekenin aıtty.
Óz kezeginde, Ózbekstan elshisi Qazaqstan ýaqyt synynan ótken seriktes ekenin tilge tıek etti.
«Biz barlyq salada Qazaqstannyń qoldaýyn sezingen kezder kóp bolǵan», - dedi ol.
Saıdıkram Nııazhodjaev eki el arasyndaǵy taýar aınalymy 2 mlrd dollardy quraıtynyn, 2020 jylǵa qaraı Qazaqstanmen taýar aınalymy kólemin 5 mlrd AQSh dollaryna jetkizý mindeti turǵanyn aıtty.
«Kelisimge qol jetkizilgen, rezervter de bar»,-deıdi ol.
Ózbekstan elshisi Shyǵys Qazaqstanmen tanysý úshin úsh kúndik saparǵa shyqqan. Ol «Úlbi metallýrgııa zaýytyna», MAGATE-niń az baıytylǵan ýran banki alańyna, «Qazmyrysh», «Azııa Avto» kásiporyndaryna, ǵylymı zerthanalarǵa, mýzeılerge, taýdaǵy «Nur Taý» demalys bazasyna barýdy josparlap otyr.
Ol «týrızm - ónerkásipten tys, bizdiń elder ózara tıimdi yntymaqtastyq ete alatyn taǵy bir baǵyt» ekenin aıtty.
Ózbekstan elshisi, sondaı-aq ústimizdegi jyldyń kúzinde Qazaqstanda eki el iskerleriniń óńiraralyq forýmy ótetinin jetkizdi.
