Ózbekstan elektr júıesi «KEGOC» AQ-nyń jumys isteý tártibin saqtaý týraly talaptaryna nazar aýdarmaı otyr
ASTANA. 4 qazan. QazAqparat - Qazirgi tańda Qazaqstan Birtutas elektr júıesi (BEJ) Reseı Federatsııasy Birtutas elektr júıesimen jáne Ortalyq Azııa Elektr taratý júıeleriniń birlestigimen qatar jumys istep keledi. Al bul jaǵdaıda Ózbekstan energııa júıesiniń turaqsyz jumysy jáne qýattyń josparsyz suryptalýy apatqa qarsy avtomatıkalardyń iske qosylýyna jáne Qazaqstannyń ońtústik aımaqtaryndaǵy tutynýshylardyń ajyratylýyna ákep soqtyryp otyr. Osynyń saldarynan ótken kúzgi-qysqy maýsymdarda «Qazaqstannyń Soltústik - Ońtústik» tasymalynda 4 márte ajyratý oryn alyp, 1300 márte apatqa qarsy avtomatıka iske qosyldy. Bul týraly «KEGOC» AQ baspasóz qyzmetinen habarlandy.
«Atalǵan jaǵdaı Qazaqtan BEJ-niń Reseı Federatsııasy energııa júıesimen qatarlas jumys isteý tártibine da keri áser etýde. Budan bólek, osy ýaqytqa deıin kelisim qatynastary men «Ózbekenergo» mekemesi tarapynan aǵymdaǵy jyldyń basynan bastap alynǵan qyzmetter men elektr energııa qaryzdaryn qaıtarý máseleleri rettelmegen. Sonymen birge, qýatty retteý (aǵymdaǵy jyldyń basynan bastap 10 mıllıon AQSh dollarynan astam somaǵa jetetin 2500 MVt kóleminde) kelisimine qol qoıylmaǵan jáne osy jyldyń qysqy maýsymynda Qazaqstan BEJ-nen jospardan tys alynǵan 7 mln. AQSh dollary somasyndaǵy energııa aqysy tólenbegen. «KEGOC» AQ-nyń jumys isteý tártibiniń saqtalýy jóninde alǵa tartqan birneshe márte talaptary «Ózbekenergo» MAK tarapynan nazardan tys qalyp keledi. Aldaǵy kúzgi-qysqy maýsymda ózbek energııa júıesimen ornyqsyz jumys tutynýshylardyń jalpy ajyratylý boıynsha júıelik apattarynyń týyndaý qaýpin arttyrady», - delingen baspasóz habarlamasynda.
Osyǵan oraı, tutynýshylardy elektrmen jabdyqtaý senimdiligin qamtamasyz etý úshin «KEGOC» AQ Qazaqstan Respýblıkasynyń Úkimetine Ózbekstan energııa júıesimen jekelegen jumystarǵa ótý jáne Reseı Federatsııasy men Qyrǵyz Respýblıkasynyń energııa júıelerimen qatarlas jumysynyń saqtalýy jóninde usynystar engizedi.
