Ózbekstan eksportynyń 35% altyn saýdasyna tıisili
TAShKENT. KAZINFORM — Bıyl 8 aıda Ózbekstan altyn eksportyn shamamen úsh ese arttyrdy, dep habarlaıdy Kazinform agenttiginiń menshikti tilshisi.
Ulttyq statıstıka komıtetiniń aqparatyna saı, qańtar-tamyz aralyǵynda Ózbekstan 8,42 mlrd dollardyń altynyn shet elderdiń naryǵyna shyǵardy. 2024 jyldyń segiz aıymen salystyrǵanda bul 68,9 paıyzǵa kóp.
Ásirese, kórshiles memleket sáýirde altyn eksportyn eki eseledi. ıAǵnı, ol aıda Ózbekstan qymbat metall saýdasynan 1,91 mlrd dollar paıda tapty.
Qańtar-tamyz aralyǵynda resmı Tashkenttiń jalpy eksporty 22,9 mlrd dollar bolsa, sonyń 35 paıyzdan astamy altyn saýdasynan túsken kiriske tıesili.
Aıta keteıik, bul ýaqytqa deıin eń joǵary kórsetkish 2023 jyly tirkeldi. Ol kezeńde altyn eksporty esebinen el ekonomıkasy 8,15 mlrd dollarǵa tolyqqan edi.
Eske salsaq, bıyl maýsymda Ózbekstannyń halyqaralyq rezervteri men altyn-valıýta qory 1,1 mlrd dollarǵa qysqardy. 1 shildedegi málimetke saı, Ortalyq banktiń rezervindegi aktıvterdiń jalpy quny 48,5 mlrd dollarǵa baǵalanǵan. Al mamyrdyń qorytyndysy boıynsha kórshiles eldiń altyn-valıýta qory 49,6 mlrd dollar bolǵan edi.