Ózbekstan ekonomıkasynyń 5 mlrd dollardan asa qarajaty kóleńkede qalyp otyr

TAShKENT. KAZINFORM – Bıyl qańtar-maýsym aralyǵynda Ózbekstannyń ishki jalpy ónimi 7,2 paıyzǵa ósip, onyń kólemi 807,9 trln sýmdy (shamamen 64,5 mlrd dollar) shamalady, dep habarlaıdy Kazinform agenttiginiń menshikti tilshisi.

Ulttyq statıstıka komıtetiniń málimetinshe, alǵashqy jartyjyldyqta baqylanbaıtyn ekonomıkanyń kólemi 265,5 trln sýmǵa (21,2 mlrd dollar) jetti. Bul mólsher ishki jalpy óniminiń 32,9 paıyzyna teńeldi jáne qańtar aıyndaǵy derektermen salystyrǵanda 0,9 paıyzǵa kóp.

Bul rette kóleńkeli ekonomıkanyń úlesi azaıyp keledi. ıAǵnı, qańtarda ol ishki jalpy ónimniń 8,4 paıyzyna jetse, alty aıdyń qorytyndysy boıynsha atalǵan kórsetkish 8 paıyzǵa deıin tómendedi. Tıisinshe, qazir 64,2 trln sým (5,1 mlrd dollar) kóleńkede qalyp otyr.

Bul - halyqtyń beıresmı kásibin zańdastyrýǵa belsendi kiriskenin jáne úkimet tarapynan qabyldanǵan sharalardyń nátıje bere bastaǵanyn ańǵartady.

Vedomstvonyń aqparatyna saı, qarajatyn esepke alý múmkin bolmaı turǵan sektorlardyń kóshin aýyl, orman jáne balyq sharýashylyqtary bastap tur. Odan keıingi úles qurylys, qyzmet kórsetý jáne ónerkásip salalaryna tıesili.

Naqtylaı keteıik, baqylanbaıtyn ekonomıka - bul statıstıka organdary tolyq esepke ala almaı otyrǵan aınalymdaǵy qarajat. Oǵan beıresmı jáne kóleńkeli ekonomıka kiredi.

Eske salaıyq, byltyr Ózbekstanda baqylanbaıtyn ekonomıkanyń kólemi 505 trln sýmnan (shamamen $38,9 mlrd) asqan edi.

Sonymen qosa, 2023 jyly kóleńkeli ekonomıkadan Ózbekstannyń memlekettik bıýdjetine $2,4 mlrd zalal keldi.

Byltyr Ózbekstannyń Ekonomıka jáne qarjy mınıstri Djamshıd Kýchkarov eldegi kóleńkeli ekonomıkanyń kólemi jalpy ishki ónimniń 25-ten 45 paıyzyna deıingi aralyqta ekenin málimdep edi.