Ózbekstan eki jylda Mońǵolııadan 100 myń bas usaq mal satyp alýǵa nıetti

TAShKENT. KAZINFORM — Kórshiles eldiń prezıdenti Shavkat Mırzıeev Ózbekstan men Mońǵolııa arasyndaǵy aýyl sharýashylyǵy jáne azyq-túlik salalaryndaǵy jobalardy iske asyrýǵa baǵyttaǵan qaýlyǵa qol qoıdy, dep habarlaıdy Kazinform agenttiginiń menshikti tilshisi.

Qujatta jazylǵandaı, Mońǵolııadan ushaqpen usaq mal ımporttaıtyn ózbekstandyq kásipkerlerdiń jarty shyǵyny memlekettik bıýdjet esebinen óteledi. Munymen birge, sharýalarǵa 10% mólsherlememen 5 jylǵa nesıe usynylady.

Resmı Tashkent 2027 jylǵa deıin Ulan-Batyrdan 100 myń bas mal satyp alýdy josparlap otyr. Tıisinshe, 2029 jyldyń sońyna qaraı ákelingen mal basyn selektsııalaý arqyly 1 mıllıonǵa jetkizýge nıetti. Sonymen qatar, kórshiles memleket teri óńdeý isin jolǵa qoımaq.

Eske salaıyq, byltyr maýsymda Mońǵolııa prezıdenti Ýhnaagıın Hýrelsýh Ózbekstanǵa memlekettik saparmen keldi. Onyń barysynda taraptar 14 qujatqa qol qoıyp, ózara taýar aınalymy kólemin 5-10 ese ulǵaıtýǵa ýaǵdalasty. Sondaı-aq, Ýhnaagıın Hýrelsýh pen Shavkat Mırzıeev jaýapty vedomstvolarǵa Ulan-Batyr men Tashkentte resmı saýda úılerin ashýdy tapsyrdy.