Ózbekstan eki aýylyn Qyrǵyzstanǵa berý protsesin bastady
ASTANA. KAZINFORM – Qyrǵyzstan men Ózbekstan memlekettik shekarany demarkatsııalaý týraly kelisimderdi júzege asyrý aıasynda jer ýchaskelerin almasýmen baılanysty uıymdastyrýshylyq jáne tehnıkalyq sharalardy bastady, dep habarlaıdy Kabar aqparat agenttigi.
Kadamjaı aýdanynda jer ýchaskelerin almasýdy júzege asyrý boıynsha eki eldiń birlesken jumys komıssııasynyń kezekti otyrysy ótti. Onda uıymdastyrýshylyq-tehnıkalyq máseleler, sonyń ishinde berilip otyrǵan aýmaqtardyń turǵyndarynyń azamattyq mártebesin anyqtaý, olardy tirkeý, qonystandyrý, sondaı-aq múliktik, ekonomıkalyq jáne basqa da máselelerdi sheshý talqylandy.
Eki eldiń birlesken jumys toby jergilikti deńgeıde halyqqa túsindirý jumystaryn júrgize bastady.
Jumys tobyn Qyrǵyz Respýblıkasy Prezıdentiniń Batken oblysyndaǵy ókiletti ókiliniń birinshi orynbasary Baqtybek Toqsonbaev jáne Ózbekstan Іshki ister mınıstrliginiń Kóshi-qon jáne jekeshelendirý departamenti bastyǵynyń orynbasary Bekzod Saıfýllaev basqaryp otyr.
Memlekettik shekarany belgileý kezinde buryn Ózbekstannyń Ferǵana oblysynyń quramyna kirgen Chon-Gara jáne Tash-Tobo aýyldary Qyrǵyzstanǵa berilgeni atap ótildi. Bul eldi mekenderde negizinen etnıkalyq qyrǵyzdar turyp jatyr.
Aldyn ala málimet boıynsha, eki aýylda shamamen 2500 adam turady.
Qazirgi ýaqytta aýyldarda tirkeý sharalary júrip jatyr. Kelesi kezeń turǵyndarǵa Qyrǵyzstan azamattyǵyn berý úshin zańmen kózdelgen rásimderdi engizýdi qamtıdy.
Qyrǵyzstan men Ózbekstan arasyndaǵy kelisimderge sáıkes, berilgen aýyldardyń ornyna Qyrǵyzstan tarapy Ózbekstanǵa memlekettik shekara mańyndaǵy balama jer ýchaskesin beredi.
Kazinform úshin arnaıy Kabar seriktes agenttigi usynǵan.
Buǵan deıin Qyrǵyzstan men Ózbekstan taýar aınalymyn 2 mlrd dollarǵa deıin arttyrýdy kózdep otyrǵanyn habarlaǵan edik.
