Ózbekstan Dúnıejúzilik saýda uıymyna qosylý boıynsha taǵy úsh elmen kelissózdi aıaqtady

TAShKENT. KAZINFORM – Dúnıejúzilik saýda uıymyna (DSU) qosylý boıynsha Ózbekstan Argentına, Aýstralııa jáne Gondýraspen kelissózderdi qorytyndylady, dep habarlaıdy Kazinform agenttiginiń menshikti tilshisi. 

Bul týraly DSU máseleleri jónindegi Ózbekstan basshysynyń arnaıy ókili Azızbek Ýrýnov málim etti. Onyń aıtýynsha, atalǵan hattamalarǵa kórshiles el Prezıdenti Ákimshiliginiń jetekshisi Saıda Mırzıeevanyń qatysýymen Jenevada ótken kelissóz barysynda qol qoıyldy. 

– Bul bizdiń tek DSU-ǵa qosylýymyzǵa baǵyttalǵan mámileler emes, sonymen qatar tıisti kelisimder Ózbekstannyń álem elderimen iskerlik baılanystardy nyǵaıtýyna jol ashady, - dep habarlady Azızbek Ýrýnov.

Onyń aıtýynsha, qazirgi ýaqytta Ózbekstan 29 elmen kelissózdi aıaqtady. Endi osyndaı hattamalardy rastaýy tıis taǵy úsh memleket qalyp otyr.

Buǵan deıin habarlaǵanymyzdaı, Ózbekstan DSU-ǵa qosylý kelissózderin bıyl aıaqtaýǵa nıetti.

Sondaı-aq DSU-ǵa qosylý boıynsha Qytaı men Ózbekstan arasyndaǵy kelissózge bıyl Astanada núkte qoıyldy.