Ózbekstan Dúnıejúzilik saýda uıymyna kirý boıynsha kelissózderdi jedeldetpek

TAShKENT. QazAqparat – Shavkat Mırzıeev «Ózbekstan Respýblıkasynyń Dúnıejúzilik saýda uıymyna kirý protsesin jedeldetý jónindegi qosymsha sharalar týraly» qaýlyǵa qol qoıdy, dep habarlaıdy QazAqparat menshikti tilshisi.

Qujatqa sáıkes, Dúnıejúzilik saýda uıymymen (DSU) jumys jónindegi vedomstvoaralyq komıssııanyń jáne kelissózder tobynyń quramy ózgeredi. Sondaı-aq Prezıdent Ákimshiliginiń qurylymyna DSU máseleleri boıynsha Prezıdenttiń arnaıy ókili laýazymy engizildi. Oǵan buryn Prezıdent Ákimshiliginiń jaýapty qyzmetkeri bolǵan Azız Ýrýnov taǵaıyndaldy. Arnaıy ókil kelissózder tobynyń basshysy, sondaı-aq DSU-men jumys jónindegi vedomstvoaralyq komıssııa tóraǵasynyń orynbasary sanalady.

Buǵan qosa, Investıtsııalar, ónerkásip jáne saýda mınıstrliginiń qurylymynda DSU-men jumys jáne saýda kelissózderi jónindegi departament qurylady. 20 mınıstrlik pen vedomstvolarda DSU máseleleri jónindegi bólimsheler jasaqtalady.

Ózbekstan Respýblıkasynyń BUU jáne Jenevadaǵy basqa da halyqaralyq uıymdardaǵy turaqty ókildiginde DSU máseleleri boıynsha birinshi hatshy laýazymdary engiziledi.

Ádilet mınıstrligi ulttyq zańnamany Dúnıejúzilik saýda uıymy kelisimderine sáıkes keltirýi tıis. Bıyl 1 shildeden bastap uıymnyń erejeleri men normalaryna saı emes normatıvtik-quqyqtyq aktilerdiń jobalaryn ázirleýge tyıym salynady.

Ózbekstannyń DSU-ǵa kirýine baılanysty is-sharalardy ótkizý úshin qajet qarajat ta bekitilgen. Bıyl bul baǵyttaǵy jumystarǵa 30 mlrd sým baǵyttalady.