Ózbekstan DSU-ǵa qosylý kelissózderin bıyl aıaqtaýǵa nıetti

TAShKENT. KAZINFORM – Ózbekstan prezıdenti Shavkat Mırzıeev Dúnıejúzilik saýda uıymyna qosylýǵa baǵyttylǵan josparlarmen tanysty, dep habarlaıdy Kazinform agenttiginiń menshikti tilshisi.

Osy kezge deıin ózbek tarapy DSU-ǵa qosylý boıynsha 33 elmen kelissóz júrgizip, sáıkesinshe 24 memleketpen tıisti kelisim jasady.

Búginde ulttyq zańnamany uıym standartyna sáıkestendirý jumysy júrgizilip jatyr. Atap aıtqanda, 13 zań, prezıdenttiń 10 jarlyǵy men qaýlysy, Mınıstrler Kabınetiniń 19 qaýlysy jáne 10 vedomstvoaralyq normatıvtik-quqyqtyq akti qabyldandy.

Keńes barysynda Shavkat Mırzıeev DSU-ǵa qosylý protsesin jedeldetý boıynsha tapsyrma berdi.

- Prezıdent jyl sońyna deıin qalǵan 9 elmen ekijaqty kelissózderdi aıaqtap, jumys tobynyń taǵy eki otyrysyn ótkizý mindetin júktedi. Keıin jumystardyń qorytyndy esebi ázirlenedi, - delingen Ózbekstan prezıdentiniń baspasóz qyzmeti taratqan habarlamada.

Eske salaıyq, buǵan deıin Ulybrıtanııa Ózbekstannyń DSU-ǵa qosylýy úshin tehnıkalyq kómek kórsetetinin jazyp edik.

Buǵan deıin DSU-ǵa qosylý boıynsha Ózbekstan AQSh jáne Qytaımen arada ótken kelissózderdi qorytyndylady.