Ózbekstan DSM: Koronavırýs juqtyrǵany rastalǵan naýqas ınfarkten qaıtys boldy

NUR-SULTAN. QazAqparat – Ózbekstan Densaýlyq saqtaý mınıstrligi koronavırýs juqtyrǵany rastalǵan naýqas ınfarkten qaıtys bolǵanyn málimdedi, dep habarlaıdy QazAqparat ÓzA agenttigine silteme jasap.

«Bıyl 26 naýryzda sozylmaly aýrýlarymen dıspanserdiń baqylaýynda bolǵan Namangan qalasynyń 72 jastaǵy turǵyny R. oblystyq juqpaly aýrýlar aýrýhanasyna koronavırýstyq ınfektsııa dıagnozymen jatqyzyldy. Sol kúni shamamen 23:00 shamasynda, arnaıy zerthanalyq zertteýler nátıjesinde ınfektsııa juqtyrǵany rastalǵan», - delingen habarlamada.

Naýqasqa vırýs 12 naýryzda túrkııalyq M. esimdi qyzdan juqqan, oǵan da osy aýrý dıagnozy qoıylyp, karantınge jatqyzylǵan.

Naýqas kóptegen jyldar boıy dıabetpen, sozylmaly jedel júrek jetkiliksizdigimen jáne basqa da aýrýlardan zardap shekken. Ol búgin tańerteń saǵat 4.30-da ótkir mıokard ınfarktisinen qaıtys boldy.