Ózbekstan BYD elektromobılderin Qazaqstan men Aýǵanstanǵa eksporttamaq
TAShKENT. KAZINFORM – Ózbekstannyń Jızaq oblysynda ornalasqan BYD kásiporny óz ónimin aımaq elderine eksportaýdy josparlap otyr. Bul týraly atalǵan óńirdiń ákimi Ýlýgbek Mýstafoev málim etti, dep habarlaıdy Kazinform agenttiginiń Tashkenttegi menshikti tilshisi.
Ákimniń aıtýynsha, ınfraqurylymdy damytý esebinen oblystyń ınvestıtsııalyq tartymdylyǵyn arta tústi.
- Sizdiń qoldaýyńyzdyń arqasynda keıingi 10 jylda Jızaq oblysy agrarlyq aımaqtan ónerkásiptik óńirge aınaldy. Bul rette oblystaǵy ınfroqurylymdyq jobalardy damytý arqyly ınvestıtsııa aǵyny artty, - dedi Ýlýgbek Mýstafoev prezıdent Shavkat Mırzıeevke esep bere otyryp.
Sonymen qatar ol BYD kompanııasy alǵash ret aımaq memleketterine elektromobıl eksportyn bastaıtynyn aıtty.
- BYD kásiporny alǵash ret Qazaqstanǵa elektromobıl eksportyn bastaıdy. Biz sondaı-aq, kólikterdi Termezge jáne ony odan ári Aýǵanstanǵa jetkizýdi josparlap otyrmyz, - dedi oblys ákimi.
Eske salaıyq, byltyr Ózbekstan shet elderden 1,1 mlrd dollarǵa 79 822 kólik ımporttady. Jalpy ımporttyń 71,2% (56 832 kólik) elektromobılderge tıesili. Osylaısha, byltyr mundaı temir tulparlardy satyp alý kórsetkishi eki ese ósip, onyń somasy 700 mln dollardan asty.
