Ózbekstan BUU Qaýipsizdik keńesiniń músheligine óz kandıdatýrasyn usyndy
TAShKENT. KAZINFORM – Ózbekstan 2035-2036 jyldar aralyǵynda BUU Qaýipsizdik keńesiniń turaqty emes músheligine óz kandıdatýrasyn usyndy, dep habarlaıdy Kazinform agenttiginiń menshikti tilshisi.
Syrtqy ister mınıstrligine qarasty Dunyo aqparat agenttiginiń málimetinshe, BUU Qaýipsizdik keńesiniń otyrysynda sóz sóılegen Ózbekstannyń atalǵan uıymdaǵy turaqty ókili Ýlýgbek Lapasov elde atqarylyp jatqan reformalardy baıandady.
Ol resmı Tashkent óńirlik yntymaqtastyqty nyǵaıtý men Aýǵanstannyń ekonomıkalyq ilerileýine qoldaý kórsetetinin atap ótti. Sonymen qatar, Ýlýgbek Lapasov kórshiles el zańsyz esirtki aınalymy, terrorızm men uıymdasqan qylmystyq toptarǵa qarsy áreket etý úshin BUU-men birlesken jumys atqarýǵa múddeli ekenin jetkizdi.
Baıandama sońynda ol Ózbekstan 2035-2036 jyldar aralyǵynda BUU Qaýipsizdik keńesiniń turaqty emes músheligine óz kandıdatýrasyn usynǵanyn málim etti.
Eske salaıyq, buǵan deıin BUU Jahandyq sharty Qazaqstan men Ortalyq Azııaǵa qalaı áser etetinin jazyp edik.
Sonymen qatar, taıaýda BUU ókilderi Ortalyq Azııa elderi sý tapshylyǵynan jylyna $2 mlrd joǵaltýy múmkin ekenin málimdedi.