Ózbekstan Buharǵa baratyn týrıster sanyn 8 mıllıonǵa arttyrýǵa nıetti
TAShKENT. KAZINFORM – Ózbekstan úkimeti Buhara qalasynyń týrıstik áleýetin arttyrý maqsatynda onda jańa áýejaı salady, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Ózbekstan prezıdentiniń baspasóz qyzmetinen málim etkendeı, qazir jumys istep turǵan Buhara áýejaıynyń týrıst qabyldaý qaýqary tómen. Ol saǵatyna 400 jolaýshyǵa (jylyna 1 mln týrıst) qyzmet kórsete alady.
«Ushý protsesin basqarý men jolaýshylarǵa qyzmet kórsetý, sondaı-aq reısterdiń sanyn ulǵaıtýǵa eskirgen júıeler qolbaılaý bolyp otyr. Týrısterdiń kópshiligi Buharaǵa jetý úshin áýeli Tashkent, Samarqan nemese Úrgenishke ushýǵa májbúr. Mysaly, bıyl 9 aıda Buharada bolǵan 1 mln-nan astam sheteldik týrıstiń 95%-y poıyzben nemese kólikpen barǵan», - delingen Ózbekstan basshysynyń baspasóz qyzmeti taratqan habarlamada.
Aımaqta qonaq úı qyzmeti men qasıetti mekenderge saıahat jasaý isi damyp keledi. Aldaǵy 3 jylda Buharaǵa keletin saıahatshylardyń sanyn 8 mln-ǵa deıin arttyrý josparlanyp otyr.
Osyǵan baılanysty bıyl 31 mamyrda Shavkat Mırzıeevtiń Buhara oblysyna jasaǵan sapary barysynda jańa halyqaralyq áýejaıdyń qurylysy bastaldy. Joba sheńberinde memlekettik-jekemenshik áriptestik negizinde álemdik standartqa saı keletin nysan boı kótermek.
Áýejaı saǵatyna 1200 jolaýshyǵa (jylyna 3 mln) qyzmet kórsetip, 8 ushaqty qabyldaýy tıis. Sondaı-aq, oǵan jańa áýekompanııalardy tartý qarastyrylyp jatyr.
