Ózbekstan bizden 300 myń tonna kartop satyp alýǵa daıyn – Aıdarbek Saparov

NUR-SULTAN. QazAqparat – Qazaqstan kartobyna Ózbekstan men men Reseıde suranys joǵary. QR Aýyl sharýashylyǵy birinshi vıtse-mınıstri Aıdarbek Saparov Úkimet otyrysyndaı osyndaı derek aıtty, dep habarlaıdy QazAqparat tilshisi.

«Áleýmettik mańyzy bar taýarlar úshin shıkizat óndirisine jeke toqtalǵym keledi. Ótken jyl kórsetkendeı, aldyn ala josparlaý jáne qajetti daqyldardyń alqaptaryn ulǵaıtý jumystary nátıje beredi. Mysaly, 2020 jyly qaraqumyq alqaby 50 myń gektarǵa ulǵaıtylyp, nátıjesinde naryqta jarma tapshylyǵy baıqalmady. Qarqyndy joǵaltpaı 100 myń ga qaraqumyq egisin kelesi jyly da saqtaý qajet», - degen vıtse-mınıstr kartop daóylynyń kólemi jetkilikti mólsherde ulǵaımaı jatqanyn atady.

«Kartoptyń ósimi bar bolǵany 5 myń gektardy quraıdy. Bul 100-110 myń tonna kartop degen sóz. Bul rette tek Ózbekstan kelesi jyly bizden 300 myń tonna satyp alýǵa daıyn, sondaı-aq Reseı de bar. Uıymdastyrylǵan fermalarda kartop óndirisine basa nazar aýdarý kerek», - dedi vedomstvo ókili.

Vıtse-mınıstrdiń aıtýyna qaraǵanda, egis naýqanyn ótkizý úshin aýyl sharýashylyǵy qurylymdarynda 144,0 myń traktor, 4,7 myń birlik ónimdiligi joǵary egis keshenderi, 77 myń tuqym sepkish, 221 myń topyraq óńdeý quraldary bar.

«Bir mezgilde birneshe tehnologııalyq operatsııalardy oryndaıtyn zamanaýı egis keshenderiniń 4,7 myńnan astam birligi dándi daqyldardyń 70%-yn egýdi júzege asyrýǵa múmkindik beredi.

Atalǵan tehnıkanyń daıyndyǵy qazirgi kúnge shamamen 92%-dy quraıdy. Egis jumystaryn jappaı júrgizýdi bastaýǵa daıyndyq 100% qamtamasyz etiledi», - dedi Aıdarbek Saparov.