Ózbekstan bıligi iri AES salý múmkindigin qarastyryp jatyr
TAShKENT. KAZINFORM – Ózbekstan prezıdenti Shavkat Mırzıeev eldegi atom energetıkasyn damytýǵa baǵyttalǵan josparlarmen tanysty, dep habarlaıdy Kazinform agenttiginiń menshikti tilshisi.
Keıingi 5 jylda Ózbekstanda elektr energııasyn óndirý 30%-ǵa ulǵaıyp, 81,5 mlrd kılovatt-saǵatqa jetti. Sonymen qatar, kórshiles el jańartylatyn energııa kózderin damytýǵa da erekshe nazar aýdara bastady. Atap aıtqanda, búginde olardyń jalpy úlesi 16%-ǵa teńeldi.
Keńes barysynda Shavkat Mırzıeevke salaǵa qatysty boljamdar da usynyldy. Oǵan saı, 2035 jylǵa qaraı eldegi elektr energııasyn tutyný kólemi 121 mlrd kılovatt-saǵatqa jetýi yqtımal. Tıisinshe, Ózbekstan prezıdenti elektr energııasyn óndirý kólemin arttyrýdy tapsyrdy.
Osy oraıda, resmı Tashkent atom elektr stantsııalaryn salý perspektıvaly sheshim ekenine toqtalyp otyr. Búginde Ózbekstanda az qýatty AES qurý jobasy boıynsha jumys júrgizilip jatyr.
Keńeste Shavkat Mırzıeev jaýapty tulǵalarǵa AES-ti sapaly salý úshin seriktestermen kezdesý ótkizip, halyqaralyq uıymdar tarapynan tıisti ruqsat alýdy júktedi. Sondaı-aq, jıynda elde úlken atom elektr stantsııasyn salý múmkindikteri qarastyryldy. Atap aıtqanda, qazir tehnıkalyq jáne ekonomıkalyq turǵydan taldaý jasalyp jatyr.
Toqtala keteıik, taıaýda Uzatom agenttiginiń dırektory Azım Ahmedhadjaev Ózbekstanda salynatyn AES-tiń quny 2 mlrd dollardan az bolatynyn málim etti.
Eske salaıyq, Ózbekstanda reseılik tehnologııa boıynsha óńirdegi alǵashqy az qýatty atom elektr stantsııasy salynady. Árqaısysynyń qýaty 55 MVt bolatyn 6 reaktor (jalpy qýaty – 330 MVt) Djızak oblysyndaǵy Týzkan kólinde boı kóteredi. AES-tiń alǵashqy reaktory 2029 jyldyń sońynda iske qosylmaq. Al ol tolyq qýatta 2033 jyldan bastap jumys isteıdi dep josparlanǵan.
Osyǵan saı, taıaýda Ózbekstan men Reseı AES salý kelisimshartynyń kúshine ený hattamasyna qol qoıdy.
Sonymen qatar, AES salý úshin halyqaralyq konsortsıým qurylady.
Buǵan qosa, taıaýda Kazinform agenttigine suhbat bergen Uzatom agenttiginiń dırektory Azım Ahmedhadjaev alǵashqy ýaqytta Ózbekstan ıadrolyq otyn qaldyǵyn salynatyn AES-tiń aýmaǵynda saqtaıtynyn málim etti.