Frantsııanyń ońtústik-shyǵysynda 400-den astam órt sóndirýshi tilsiz jaýmen kúresip jatyr
PARIJ. KAZINFORM – Frantsııanyń ońtústik-shyǵysyndaǵy Drom departamentinde bir aptaǵa jýyq ýaqyttan beri jalǵasyp jatqan orman órtin áli de tolyq sóndirý múmkin bolmaı otyr. Bul týraly Anadoly habarlaıdy.
Jergilikti BAQ málimetinshe, el aýmaǵyndaǵy órtterdiń basym bóligi baqylaýǵa alynǵan. Alaıda Drom departamentiniń Dea qalasynda jalyn shamamen 400 gektar aýmaqty sharpyǵan.
Órtti sóndirý jumystary kezinde tórt órt sóndirýshi jeńil jaraqat aldy. Tilsiz jaýmen kúreske 400-den astam maman jumyldyrylǵan. Olarǵa tórt tikushaq jáne/nemese amfıbııalyq ushaq kómektesip jatyr.
Býsh-dıý-Ron departamentiniń Fonveı qalasyndaǵy órt keshe baqylaýǵa alyndy.
Frantsııanyń meteorologııalyq qyzmeti 17 departamentte órt qaýpi joǵary ekenin eskertti.
Sonymen qatar Météo-France elde aptap ystyqtyń jańa tolqyny bastalǵanyn habarlady. Osyǵan baılanysty 22 departamentte temperatýra qaýpiniń «qyzǵylt sary» deńgeıi jarııalandy.
Bıyl Frantsııa tarıhyndaǵy eń aýqymdy órt qaýpi maýsymyn bastan ótkerip jatyr. Órt saldarynan elde 117 myń gektar aýmaq janyp ketti.
Osyǵan deıin Frantsııada orman órtteriniń beti qaıtqany týraly jarııalanǵan edi.
