Ózbekstan belsendi týrızmdi damytýǵa basymdyq bermek
TAShKENT. KAZINFORM – Ózbekstanda belsendi týrızm túrlerin damytý jobasy ázirlendi. Qujatty daıyndaý barysynda Qazaqstan, Qyrǵyzstan, Shveıtsarııa, Avstrııa, Frantsııa jáne Grýzııa sııaqty taýly elderdiń tájirıbesi zerdelendi.
Joba aıasynda belsendi týrızmdi damytýǵa áleýeti joǵary 162 tabıǵı nysan anyqtaldy. Olardyń qatarynda 88 taý men taý jotasy, 21 kól, 20 sarqyrama, 18 úńgir men grot jáne 15 taý shyńy bar. Bul nysandar eldiń bes óńirinde ornalasqan.
Ekstremaldy týrızm nysandaryn qurý jáne tirkeýdiń biryńǵaı tártibin engizý josparlanyp otyr. Jańa júıe zıplaın, rodelban, bandjı-djampıng, taı-park jáne aspaly kópir sııaqty nysandardy qamtıdy.
Sheteldik týrıster men jergilikti turǵyndardyń taýly jáne shekara mańyndaǵy aýmaqtarǵa barýyn jeńildetý kózdelgen. Arnaıy ruqsattardy elektrondy túrde Biryńǵaı ınteraktıvti memlekettik qyzmetter portaly arqyly rásimdeýge bolady. Elektrondy ruqsatty 10 kún ishinde alý múmkindigi qarastyrylǵan.
Jobada gıdter men taý nusqaýshylaryn halyqaralyq deńgeıde daıarlaýǵa erekshe mán berilgen. Oqý baǵdarlamalaryn halyqaralyq standarttarǵa sáıkestendirý josparlanyp otyr. Sonymen qatar Ózbekstannyń birqatar óńirinde mamandandyrylǵan oqý kýrstary ashylady.
Belsendi týrızmniń jańa baǵyty retinde shaǵyn avıatsııany damytýǵa da nazar aýdarylǵan. Elde jeńil áýe kemeleriniń ushý tártibin jetildirý josparlanyp otyr. Sondaı-aq «Shaǵyn avıatsııa» biryńǵaı elektrondy platformasy iske qosylady. Ushqyshtardy daıarlaý júıesi damytylyp, óńirlerdegi áýeaılaqtar týrıstik maqsatta paıdalaný úshin qaıta qalpyna keltiriledi.
Budan bólek, 2027 jyldan bastap Ózbekstanda belsendi týrızmge arnalǵan jabdyqtar men qural-jabdyqtardy ımporttaý kezinde kedendik bajdardy alyp tastaý josparlanyp otyr. Jeńildik kvadrotsıklderge, jol talǵamaıtyn kólikterge, avtokemperlerge, gıdrotsıklderge, paraplandarǵa jáne taý týrızmine arnalǵan jabdyqtarǵa qatysty bolady.
Bul jeńildik 2030 jylǵa deıin qoldanylady. Onyń negizgi maqsaty – týrıstik bıznes shyǵyndaryn azaıtý.
Josparlanǵan sharalar Ózbekstanda belsendi jáne ekstremaldy týrızmniń damýyna serpin beredi dep kútiledi. Sondaı-aq jańa týrıstik ónimder men jumys oryndarynyń paıda bolýyna jaǵdaı jasalady. Týrısterdiń qaýipsizdigin halyqaralyq standarttarǵa saı arttyrý da kózdelgen.
Buǵan deıin Qazaqstannyń Ózbekstanǵa keletin týrıster sany boıynsha kóshbasshy elderdiń qataryna kirgeni habarlanǵan bolatyn.
Osyǵan deıin jarty jylda 1,5 mıllıonnan astam qazaqstandyq Ózbekstanǵa saıahattap barǵany týraly jazdyq.
