Ózbekstan basshysy «Ortalyq Azııa — Qytaı» sammıtine qatysý úshin erteń Astanaǵa keledi
TAShKENT. KAZINFORM — Memleket basshysy Qasym-Jomart Toqaevtyń shaqyrýymen Ózbekstan Prezıdenti Shavkat Mırzıeev 17 maýsymda «Ortalyq Azııa — Qytaı» sammıtine qatysý úshin Astanaǵa barady, dep habarlaıdy Kazinform agenttiginiń menshikti tilshisi.
Aýqymdy is-sharaǵa óńir memleketteriniń basshylary men QHR Tóraǵasy Sı Tszınpın qatysady. Taraptar saıası, saýda-ekonomıkalyq jáne mádenı-gýmanıtarlyq salalardaǵy yntymaqtastyqty nyǵaıtý múmkindigin talqylaıdy. Sonymen qatar prezıdentter óńirlik jáne halyqaralyq deńgeıdegi ózekti máseleler boıynsha pikir almasady.
Ózbekstan basshysynyń baspasóz qyzmetinen habarlaǵandaı, sammıt aıasynda Shavkat Mırzıeev Sı Tszınpınmen ekijaqty kezdesý ótkizedi.
Aıta keteıik, «Ortalyq Azııa — Qytaı» formatyndaǵy alǵashqy sammıt 2023 jyly mamyrda Qytaıdyń Sıan qalasynda uıymdastyrylǵan bolatyn.
Eske salaıyq, búgin Prezıdent Qasym-Jomart Toqaev elimizge saparmen kelgen Sı Tszınpındi Astana áýejaıynan qarsy aldy.
Keıin taraptar Aqordada kelissóz júrgizip, Qazaqstan men Qytaı arasyndaǵy strategııalyq seriktestikti tereńdetýge baǵyttalǵan 24 kelisimge qol qoıdy.