Ózbekstan basshysy Oraza aıt qarsańynda 488 adamǵa raqymshylyq jasady

TAShKENT. KAZINFORM – Oraza aıt qarsańynda Ózbekstan prezıdenti Shavkat Mırzıeev «Jazasyn ótep jatqan, jasaǵan isine ókinetin jáne ómirin ózgertýge bet alǵan adamdar tobyna raqymshylyq jasaý» jarlyǵyna qol qoıdy, dep habarlaıdy Kazinform agenttiginiń menshikti tilshisi.

Jarlyqqa saı, 488 adamǵa raqymshylyq jasaldy. Olardyń ishinde 100 sottalǵan negizgi jazasyn óteýden tolyq bosatylsa, 268 adam merziminen buryn shartty túrde bostandyqqa shyǵady. Sonymen qosa, 34 adamnyń jazasy jeńildetilip, bas bostandyǵynan aıyrylǵan 86 azamattyń merzimderi qysqardy.

Raqymshylyq jasalǵandardyń qatarynda shet memleketterdiń 17 azamaty, 37 áıel, 60 jastan asqan 37 er adam, 30 jasqa deıingi 167 adam (onyń ishinde 1 adam kámeletke tolmaǵan), sondaı-aq tyıym salynǵan uıymdardyń qyzmetine qatysqan 5 azamat bar.

Jarlyqty oryndaý sheńberinde jaýapty vedomstvolarǵa raqymshylyq alǵan adamdardy otbasyna qaıtarý, olardyń qoǵamǵa beıimdelýine járdemdesý jáne jumysqa ornalastyrý jóninde tapsyrmalar berildi.

Eske salaıyq, byltyr sáýirde Oraza aıt qarsańynda Ózbekstan prezıdenti Shavkat Mırzıeev 426 adamǵa raqymshylyq jasaǵan edi.

Sonymen qatar, byltyr jeltoqsanda Ózbekstan basshysy Konstıtýtsııa kúnine oraı 483 adamǵa raqymshylyq jasady.

Qosa ketsek, Tájikstan prezıdenti Emomalı Rahmon Naýryz merekesine oraı 897 sottalýshyǵa raqymshylyq jasady.

Al Túrikmenstan prezıdenti Serdar Berdimuhamedov Qadir túni qurmetine 321 sottalýshyǵa raqymshylyq jasady.