Ózbekstan basshysy Konstıtýtsııa kúni qarsańynda 615 adamǵa raqymshylyq jasady

TAShKENT. KAZINFORM – Konstıtýtsııa kúni qarsańynda Ózbekstan prezıdenti Shavkat Mırzıeev «Jazasyn ótep jatqan, jasaǵan isine ókinetin jáne ómirin ózgertýge bet alǵan adamdar tobyna raqymshylyq jasaý» Jarlyǵyna qol qoıdy, dep habarlaıdy Kazinform agenttiginiń menshikti tilshisi.

Jarlyqqa saı, 615 adamǵa raqymshylyq jasaldy. Olardyń ishinde 220 sottalǵan negizgi jazasyn óteýden tolyq bosatylsa,123 adam merziminen buryn shartty túrde bostandyqqa shyǵady. Sondaı-aq 97 adamnyń jazasy jeńildetilip, bas bostandyǵynan aıyrylǵan 175 azamattyń merzimderi qysqardy.

Raqymshylyq jasalǵandardyń qatarynda shet memleketterdiń 9 azamaty, 29 áıel, 60 jastan asqan 23 er adam, 30 jasqa deıingi 264 adam (onyń ishinde 2 adam kámeletke tolmaǵan), odan bólek tyıym salynǵan uıymdardyń qyzmetine qatysqan 9 azamat bar.

Jarlyqty oryndaý sheńberinde jaýapty vedomstvolarǵa raqymshylyq alǵan adamdardy otbasyna qaıtarý, olardyń qoǵamǵa beıimdelýine járdemdesý jáne jumysqa ornalastyrý jóninde tapsyrmalar berildi.

Toqtala keteıik, 8 jeltoqsanda Ózbekstan Konstıtýtsııa kúni merekesin atap ótedi. Bıyl kórshiles elde ata zańynyń qabyldanǵanyna 33 jyl tolady.

Eske salaıyq, byltyr sáýirde Oraza aıt qarsańynda Ózbekstan prezıdenti Shavkat Mırzıeev 426 adamǵa raqymshylyq jasaǵan edi. 

Sonymen qatar byltyr jeltoqsanda Ózbekstan basshysy Konstıtýtsııa kúnine oraı 483 adamǵa raqymshylyq jasady.