Ózbekstan basshysy Donald Trampqa jasalǵan qastandyqty qatań aıyptady
TAShKENT. KAZINFORM – Ózbekstan prezıdenti Shavkat Mırzıeev AQSh saıasatkeri Donald Trampqa jasalǵan qastandyqty qatań aıyptaıtynyn málim etti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
«Prezıdent Shavkat Mırzıeev Pensılvanııa shtatyndaǵy saılaýaldy baıandamasy kezinde AQSh-tyń burynǵy prezıdenti Donald Trampqa jasalǵan qastandyq týraly habardy asa alańdaýshylyqpen qabyldady. Memleket basshysy bul qastandyqty qatań aıyptaıtynyn málimdedi jáne Donald Tramptyń tezirek saýyǵyp ketýine tilektestik bildirdi», - dep jazdy Ózbekstan basshysynyń baspasóz hatshysy Sherzod Asadov.
Qosa ketsek, buǵan deıin Prezıdent Qasym-Jomart Toqaev AQSh saıasatkeri Donald Trampqa jasalǵan qastandyqty qatań aıyptaıtynyn málimdegen edi.
Eske salaıyq, buǵan deıin AQSh-tyń Pensılvanııa shtatynda saılaýaldy aktsııasy kezinde Donald Trampqa qastandyq jasalǵanyn jazǵan bolatynbyz.