Ózbekstan Bas prokýratýrasy Aýǵanstan áýe kúshteri ushaǵynyń apatqa ushyraý sebepterin atady

TAShKENT. QazAqparat - Ózbekstan Respýblıkasynyń Bas prokýratýrasy Aýǵanstan áýe kúshterine tıesili ushaqtyń Ózbekstan aýmaǵynda apatqa ushyraýynyń sebepterin atady, dep habarlaıdy QazAqparat tilshisi.

Mınıstrliktiń málimetinshe, Aýǵanstannan 22 áskerı ushaq pen 24 áskerı tikushaq 14-15 tamyz aralyǵynda Ózbekstan shekarasyn zańsyz kesip ótken. Olardyń barlyǵy Termez qalasynyń áýejaıyna qondyryldy. Bortta 585 aýǵan sarbazy bolǵan. «Sonymen birge, 15 tamyzda EMBRAYER-314 áskerı úsh ushaǵy Qarshydaǵy Hanabad áýejaıyna qonýǵa ruqsat surady. Ushaqtar Ózbekstan Qorǵanys mınıstrliginiń MıG-29 eki áskerı ushaǵynyń súıemeldeýimen Termez áýejaıyna baǵyttaldy. Alaıda, baqylaý kezinde EMBRAYER-314 pen MıG-29 ushaǵy soqtyǵysyp, Sýrhandarııa oblysynyń Sherabad aýdanynda qulady. Bul ushaqtardyń ushqyshtary parashıýtpen qondy», - dep habarlady Bas prokýratýranyń baspasóz qyzmeti.

Atalmysh vedomostvo osy fakti boıynsha qylmystyq is qozǵalǵanyn málim etti.

Esterińizge sala keteıik, búgin áleýmettik jelilerde Aýǵanstan Áskerı -áýe kúshteriniń ushaǵy Ózbekstan aýmaǵynda qulady dep boljanǵan jerden fotosýretter men beınematerıaldar taratyldy. Keıinnen Ózbekstan Respýblıkasynyń Qorǵanys mınıstrligi oqıǵanyń sebepterin jarııalamaı, Aýǵanstan áýe kúshteri ushaǵynyń apatqa ushyraý oqıǵasyn rastady.