Ózbekstan azamaty Qazaqstannan esirtki alyp ótpek bolǵan
NUR-SULTAN. QazAqparat - Ózbekstan azamaty avtokóliginiń artqy dóńgeleginiń joǵarǵy jaǵynan 7 kúdikti túınek zat anyqtaldy. Saraptama qorytyndysy boıynsha kúdikti zat - «kannabıs shaıyry» esirtki zaty bolyp shyqty, dep habarlaıdy QazAqparat Ulttyq qaýipsizdik komıtetiniń Shekara qyzmetine silteme jasap.
Túrkistan oblysyndaǵy «Jibek joly» keden beketinde tekserý barysynda 1983 jyly týǵan Ózbekstan azamaty ustaldy. Qazaqstannan Ózbekstan Respýblıkasyna ótip jatqan avtokólikterdi tekserý kezinde qyzmettik ıtterdiń kómegimen Shevrolet «Kaptıva» markaly avtokóliginen kúdikti 7 paket tabylǵan. Avtokólik júrgizýshisi - 1983 jyly týǵan Ózbekstan azamaty M.B.
«Kólik keden beketinde ornalasqan «RAPISCAN CO2» ınspektsııalyq tekserý kesheni arqyly skanerden ótkizildi. Nátıjesinde avtokóliktiń artqy dońǵalaǵynyń joǵary jaǵynan 7 dana kúdikti paket anyqtalǵan. Avtokóliktiń kúdikti zattar ornalasqan tusy «belgilenip», arnaıy turaqqa qoıyldy. Kúdikti paketten aıryqsha ıisi bar qońyr tústi zat anyqtaldy. Aıǵaqty zattar arnaıy saraptamaǵa jiberildi» delingen habarlamada.
Saraptama qorytyndysy boıynsha 3522,146 gramm «kannabıs shaıyry» esirtki zaty anyqtalyp, sotqa deıingi tergeý amaldary bastaldy.
