Ózbekstan azamaty qaraǵandylyq polıtseılerge alǵys aıtty
Ózbekstan azamaty óz jazbasynda aıtqandaı, qyrkúıek aıynda qaıǵyly oqıǵa bolǵan. Onyń 59 jastaǵy qaıyn atasy Ivan Petrovıch Mılınchýk jol ústinde syrqattanǵan. Ol uzaq jolǵa júk tasymaldaıtyn júrgizýshi bolyp jumys isteıtin edi.
2018 jyldyń 19 qyrkúıeginde Ivan Mılınchýk MAN kóligimen Almaty - Ekaterınbýrg tasjolymen Reseı shekarasyna qaraı bet alǵan. Evgenııdiń jubaıy alys jolǵa ketken ákesimen baılanyspaq bolady. Qyzy ákesiniń tiliniń kúrmelip, densaýlyǵy bolmaı turǵanyn birden baıqap, toqtaýyn suraıdy. Alaıda, Ivan Petrovıch qyzyn jubatyp, júk apara jatqanyn aıtady jáne en dalada toqtaı almaıtynyn jetkizedi.
Ivan Petrovıchtiń telefonyna ornatylǵan qosymsha arqyly týystary onyń Qaraǵandyǵa bet alǵanyn kóredi. Ákesiniń keshke qaıda ekenin bilmek bolǵan erli-zaıyptylar onyń telefonynyń óship turǵanyn túsinedi.
20 qyrkúıek kúni tańerteń olarǵa Ivan Petrovıchtiń dosy qońyraý shalyp, onyń ınsýltpen aýrýhanaǵa túsip qalǵanyn habarlaıdy. Sondaı-aq, ol Qaraǵandy oblystyq JPPB qyzmetkeri leıtenant Erqanat Datkınniń nómirin beredi. Evgenıı odan qaıǵyly oqıǵanyń mán-jaıyn estıdi.
19 qyrkúıek kúni 18:40-ta leıtenanttar Erqanat Datkın men Jasulan Egenov júk kóligin kórip, ony toqtatady. Polıtseıler onyń ishinen sóıleı, qımyldaı almaı qalǵan Ivan Petrovıchti kórip, jedel járdem shaqyrady. Erqanat Datkın júrgizýshiniń telefonyndaǵy sońǵy qońyraý shalǵan nómirge habarlasyp, mán-jaıdy aıtady. JPP qyzmetkerleri naýqasty jedel járdemniń alyp ketkenin kútedi, keıin mashınany aqyly turaqqa jetkizedi jáne taýarlar buzylyp ketpes úshin ondaǵy temperatýrany eki táýlik boıy baqylaýda ustaıdy.
Evgenıı polıtseılermen sóıleskennen keıin Qazaqstanǵa ushyp jetedi. Dárigerler Ivan Petrovıchtiń ómirin saqtap qala almaǵan, onyń mıynyń basym bóligi zardap shekken. 22 qyrkúıekte ol kóz jumady.
«Men bóten qalada, bóten elde júrsem de, maǵan eki polıtsııa qyzmetkeri - leıtenant Erqanat Ábdirahmanuly Datkın men Jasulan Jambyluly Egenov kómektesti. Olarǵa alǵysym sheksiz. Astanadan Qaraǵandyǵa jetkenge deıin olar menimen baılanysyp, aýrýhanaǵa jiberdi. Eki táýlik boıy muzdatqyshtaǵy temperatýralyq rejimdi baqylap otyrdy. Sondaı-aq, Ózbekstannan júrgizýshi kelgen kezde maǵan habarlasyp, ol adamǵa senetinimdi naqtylap, ákemniń kóligin tapsyrýǵa ruqsat surady. Sebebi, kólikte ákemizdiń jeke zattary, qujattar, aqshalar boldy», - deıdi Evgenıı Homenko.
Onyń aıtýynsha, 2 qazaqstandyq leıtenant áýejaıǵa kelgen kezde de habarlasqan.
«Meni múldem tanymaıtyn 2 bóten adam meniń problemalaryma jany kúızelip, ony sheshýge jantalasty jáne qaıǵyma ortaqtasty. Olardyń ata-anasyna, ustazdaryna, komandırlerine úlken rahmet. Eki leıtenatqa aıtar alǵysym sheksiz. Qazaqstan aýmaǵynda júrgen kezimde olarmen kezdespedim, tek telefon arqyly qashyqtyqtan baılanysyp otyrdyq. Biraq, olar naǵyz azamat retinde qol ushyn berdi. Ózimniń, jubaıymnyń jáne týystarymnyń atynan alǵys aıtamyn. Eger kómek qajet bolsa, qolymnan kelgenin aıamaımyn. Qazaqstan Respýblıkasy Іshki ister mınıstrligine osyndaı qyzmetkerler úshin kóp rahmet», - dep alǵys bildirdi hat ıesi.