Ózbekstan azamaty Almatydaǵy kóńildesiniń páterin satyp, artynan ulyn óltirmek bolǵan
ALMATY. QazAqparat - Ózbekstannyń 27 jastaǵy azamaty Almaty turǵynynyń eki páterin satyp jibergeni jáne onyń 20 jastaǵy ulyn óltirmek bolǵany úshin 12 jylǵa sottaldy, dep habarlaıdy QazAqparat tilshisi.
«1991 jyly týǵan Álisher Jańabaev aıypty dep tanylyp, 12 jylǵa bas bostyndyǵynan aıyryldy. Sondaı-aq ol jábirlenýshi Tatıana Shýlgına jáne onyń ulyna moraldyq zalal keltirgeni úshin árqaısysyna 1 mln teńgeden tóleıdi», - dep úkim oqydy sýdıa.
Ózbekstan azamaty 2012 jyldan berý Qazaqstan aýmaǵynda zańsyz júr. Jazasyn ótep bolǵan soń ony Ózbekstanǵa bes jylǵa deportatsııalaıdy.
Áýezov AІІB burynǵy qyzmetkeri, 35 jastaǵy Arlı Ońǵarbaevty sot 16 jylǵa kesti. Sondaı-aq ol aǵa leıtenant ataǵynan, ishki ister organdarynda bes jyl boıy laýazym ıelený quqyǵynan aıyrdy.
Qylmyskerlerdiń ekeýi de jazalaryn qylmystyq-atqarý júıesiniń qaýipsizdigi barynsha joǵary mekemesinde óteıdi.
Іs Almaty qalasynyń qylmystyq ister jónindegi mamandandyrylǵan aýdanaralyq sotynda qaraldy. Jábirlenýshi 45 jastaǵy Tatıana Shýlgınanyń aıtýynsha, 2015 jyly ol kúıeýimen ajyrasqan soń, Áýezov AІІB qyzmetkeri Arlı Ońǵarbaevpen tanysqan. Polıtseı áıeldiń úıinde birneshe ret bolyp, jyljymaıtyn múlikteri týraly egjeı-tegjeıli bilip alady da, jumyssyz júrgen tanysy, Ózbekstan azamatyn áıeldiń «basyn aınaldyryp», eki páterin alyp satyp jiberýge azǵyrǵan.
2018 jylǵy qańtarda ózbekstandyq 27 jastaǵy Álisher Jańabaev pen polıtsııa qyzmetkeri Arlı Ońǵarbaevqa qatysty is qozǵaldy. Osy is fıgýranttarynyń taǵy biri, Ońǵarbaevtyń týǵan aǵasyna izdeý salyndy. Ol osy iste rıeltor qyzmetin atqarǵan.
«Biz Álishermen úsh aı tanys boldyq. Bir kúni ol maǵan 1 bólmeli jáne 2 bólmeli páterimdi satyp, bıznes ashaıyq dep usynys jasady. Men oǵan sendim, satylǵan úılerdiń aqshasy 70 myń dollar boldy. Ol meni úılenemin, úı satyp alamyz dep sendirdi. Sóıtsem, aldaǵan eken. Olar meni Qyrǵyzstanǵa aparyp, quldyqqa satpaq bolǵan. Balamdy býyndyryp óltirip, pyshaqtamaq ta bolypty. Tóńirektegiler aıǵaı-shýdy estip, qutqaryp alypty», - deıdi jábirlenýshi.
Endi áıel úsh jyldan beri balasymen birge páter jaldap, eden jýyp kún kórip júr.
«Sot ádil sheshim shyǵaryp, alaıaqtardy jazalaýyn qalaımyn. Qylmyskerler páterdiń 20 mln teńgesin moraldyq zalaldyń 5 mln teńgesimen birge qaıtarsyn. Meni qorǵaýy tıis polıtseı mundaı qylmysqa barady dep oılamappyn», - degen bolatyn ol.
Álisher Jańabaevqa adam densaýlyǵyna toptasyp aýyr zııan keltirý, iri mólsherde alaıaqtyq qylmys jasaýǵa jáne adam óltirýge umtylý sııaqty 4 bap boıynsha aıyp taǵyldy.
«Men barlyq sheshimderińizge kelisemin. Biraq, 99-baptaǵyny moıyndamaımyn. Tergeýshiler meni adam óltirýge umtyldy degendi moıyndaýǵa májbúrledi», - dedi sotta Álisher Jańabaev.
Áýezov aýdandyq ishki ister bóliminiń qyzmetkeri Arlı Ońǵarbaevqa da aýyr aıyptar taǵyldy. Olardyń arasynda uıymdasqan qylmystyq top qurý, adam ómirine qastandyq jasaý sııaqty aıyptaýlar bar.
Memlekettik aıyptaýshylar Ózbekstan azamatyna 15 jyl, polıtseıge 18 jyl bas bostandyǵynan aıyrý jazasyn berýdi surady.
