Ózbekstan azamattarynyń qujattaryn tartyp alǵan polıtseı sheninen aıyryldy

NUR-SULTAN. QazAqparat – Ózbekstan azamattarynyń qujattaryn tartyp alǵan atyraýlyq polıtseı túrmege qamaldy. Sot sheshimimen ol 5 jyl bas bostandyǵynan aıyryldy, dep habarlaıdy QazAqparat tilshisi.

«Atyraý q. №2 sotynyń úkimimen Atyraý oblysy boıynsha Polıtsııa departamenti qylmystyq polıtsııa basqarmasynyń aǵa jedel ýákili polıtsııa kapıtany R.Zulqashev sottaldy. Ol ómir boıy belgili bir laýazymdardy atqarý quqyǵynan jáne polıtsııa kapıtany ataǵynan aıyryldy. Jazasyn 5 jyl boıy túrmede óteıdi», - dedi QR Sybaılas jemqorlyqqa qarsy is-qımyl agenttiginiń asa mańyzdy ister jónindegi tergeýshisi Danııar Bekaıdarov onlaın baspasóz máslıhatynda.

Ol Ózbekstan azamattarynyń pasporttaryn zańsyz tartyp alyp, olardy qaıtarý úshin aqy talap etken. Osylaısha, ókilettigin asyra paıdalanǵan.