Ózbekstan azamatshasy mas kúıinde bótenniń kóligin aıdap áketip, aýdarylǵan - Almaty oblysy
TALDYQORǴAN. QazAqparat - «Toyota Camry» avtokóliginiń rýlinde bolǵan Ózbekstan Respýblıkasynyń 33 jastaǵy azamatshasy 1 maýsym kúni «Almaty-Bishkek» tas jolynyń 43-shaqyrymynda kólikti basqara almaı, aýdaryldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, atalǵan derek QR QK 345 boıynsha «Alkogoldik masań kúıde jol júrisi nemese kólik quraldaryn paıdalaný qaǵıdalaryn buzyp abaısyzda adamnyń densaýlyǵyna aýyr zııan keltirý» boıynsha tirkeldi.
«Apat saldarynan 31 jastaǵy er adam men 23 jastaǵy áıel adam dene jaraqattaryn alyp, aýrýhanaǵa tústi. Shetel azamatshasy 2017 jyldyń 16 mamyrynda Qarasaı aýdanynyń mamandandyrylǵan aýdanaralyq ákimshilik sotymen QR ÁQBtK-niń 517-babynyń 7-bóligine sáıkes, kóshi-qon zańnamasyn birneshe ret buzǵany úshin kináli dep tanylǵan.
Onyń Qazaqstan Respýblıkasy aýmaǵynda zańsyz bolýyna baılanysty bul derek Qarasaı aýdanynyń polıtsııa bóliminde QR QK-niń 392 babynda kózdelgen qylmystyq teris qylyq retinde (QR Memlekettik shekarasyn qasaqana zańsyz kesip ótý) tirkeldi. Sonymen qatar, óziniń basqarýyndaǵy jol-kólik oqıǵasyn jasaǵan kólikti QR azamaty - ápkesinen urlap, aıdap áketken»,-dedi Almaty oblysy Polıtsııa departamenti bastyǵynyń orynbasary, polıtsııa polkovnıgi Danııar Mendebaev.
Endi ol elimizdegi qylmystyq kodekstiń úsh baby boıynsha jaýapqa tartylady.
