Ózbekstan azamatshasy Dýbaı prokýratýrasyn jaryp jibermek bolǵan
ASTANA. 2 qyrkúıek. QazAqparat - Bes jasar balasy bar Ózbekstan azamatshasy Dýbaıdyń prokýratýra ǵımaratynda ózin jaryp jibermek bolyp, 13 saǵat boıy eldi úreıde ustap otyrdy.
Ámirliktiń BAQ málimetterine qaraǵanda, jeksenbi kúni keshke qaraı Dýbaı prokýratýrasyna kishkentaı balasymen birge Ózbekstan azamatshasy kelip kirgen. Áıel arabtardyń «abaııa» dástúrli kıiminde bolǵan. Qabyldaý baǵanasyna jaqyndaı kele, ol arab tilinde ǵımaratty jaryp jiberetinin aıtqan. Sonymen qatar áıel beline jarylǵysh zat taǵylǵanyn, qolynda ony basqaratyn pýlti bar ekenin málim etken.
Bul jaǵdaıdan keıin prokýratýra ishinde baıbalam bastalyp, kelýshiler asyǵys syrtqa shyqqan. Oqıǵa oryn alǵan jer dereý qorshaýǵa alynyp, prokýratýraǵa iri polıtsııa (shamamen 20-25 ekıpaj) men azamattyq qorǵanys kúshteri tartyldy.
Ózbekstan azamatshasymen kelissózder on eki saǵatqa sozyldy. Oǵan orys tildi aýdarmashy men áıeldiń ózbek týystary da qosyldy. Nátıjesinde qos tarap bul máselede ortaq beıbit sheshimge keldi.
Aldyn ala boljam boıynsha, Ózbekstan azamatshasynyń osyndaı áreketke barýyna Dýbaıdaǵy taǵdyr taýqymeti sebep bolǵan. Onyń Sırııadan kelgen kúıeýin osyǵan deıin Dýbaı polıtseıleri ustap, jergilikti túrmege qamaǵan kórinedi. Al ózbekstandyq áıel men onyń ulynyń BAÁ-de turýǵa ruqsat merzimi aıaqtalyp, qazir olar zańsyz turyp jatyr. Sol sebepti endi áıeldiń ulynyń qujattaryn tirkeýge eshqandaı zańdy múmkindigi joq.
Lańkestik jasap qorqytpaq bolǵan ózbekstandyq áıel osy áreketimen Dýbaı basshysy sheıh Muhammed bın Ál Maktýmmen jeke kezdesip, osy jaǵdaıǵa baılanysty odan kómek suramaq bolǵan.
